Kushëriri i Noizyt i ka vënë flakën dy herë lokalit të reperit në zonën e Currilave në Durrës. Policia ka zbuluar se ky i fundit është po ashtu autor i vënies së zjarrit edhe të banesës së nënës së këngëtarit. Të tre episodet kanë ndodhur në Durrës në muajt Maj dhe Qershor.
Në pranga u vu 26-vjeçari Eraldo Musteqja. Në momentin e arrestimit atij iu sekuestrua një thikë.
Pas arrestimit të tij ka reaguar edhe Noizy i cili ka publikuar foton e kushëririt të tij dhe tregon se janë rritur bashkë dhe për të janë kujdesur edhe prindërit e reperit.
Ai shton se më vonë kushëriri i tij ndërroi fe dhe u bë një besimtar ekstremist që mendonte se lokalet s’duhet të shesin alkool dhe se muzika është haram. Kjo sipas reperit është arsyeja e veprimeve të tij.
Më pas Noizy ka publikuar një video në “Instastory”, ku Musteqja shfaqet në një makinë dhe dëgjohet të thotë se ‘do ja vendosë për herë të tretë’, duke iu referuar zjarrit të lokalit të reperit.
“Për ju që nuk besoni që është i sëmurë dhe ekstremist, këtu s’ka të bëjë cila fe, ky thjesht është bërë ekstremist dhe ka nevojë për ndihmë”, shkruan Noizy bashkëngjitur me videon.
