Kryeministri i Shqipërisë, Edi Rama ka kërcënuar “mikun” e tij Aleksandër Vuçiç të cilit i ka bërë thirrje që të lirojë 3 policët të rrëmbyer në veri të Kosovës.
Gjatë një postimi në rrjetet sociale, kreu i qeverisë shqiptare gjithashtu i ka kërkuar Albin Kurtit që së bashku me Vuçiç të ulin gjakrat në lidhje me situatën në veri të vendit.
Gjithashtu Rama paralajmëron rikthimin e marrëdhënieve të akullta Shqipëri-Serbi.
“Sa më shumë mbahen në Serbi këta tre burra që edhe sikur ta kenë shkelur vijën e kufirit s’kanë kryer asnjë krim, aq më pak do jetë e mundur që marrëdhëniet tona bilaterale të mos bëjnë shumë hapa mbrapa! Kjo do jetë java e rikthimit të akullit mes nesh nëse ata nuk lirohen!
Nga ana tjetër nëse de-eskalimi nuk ndodh e humbura e madhe do të jetë Kosova – sepse Serbia mbase nuk jeton dot pa u ri-izoluar! Druaj shumë se sa më shumë Albini këmbëngul në të tijën kundër aleatëve, aq më shumë situata mund të agravohet, duke rikthyer KFORin në krye të punës!
E atëherë lamtumirë për kushedi sa kohë edhe kontrollit formal të shtetit mbi krejt territorin dhe ta gëzojmë një Republikë të KFORit në Veriun e Kosovës! Albin dil nga guacka e vetizolimit dhe mos e humb Veriun duke parë kudo armiq e tradhëtarë! Koha është tani dhe po fluturon!”, shkrua Edi Rama.
