Dinamo ka bërë së fundi një riorganizim të strukturave drejtuese të saj. Nuk ka një njoftim zyrtar nga klubi kryeqytetas, por në një mbledhje të fundit që presidentit Adrian Bardhi të bërë me drejtuesit e klubit, janë bërë disa ndryshime. Dinamoja e re do të jetë më tepër në dorë të Kristjan Gjidodajt, ortak i presidentit Bardhi.
Ai do të bëjë pak a shumë rolin e administratorit, pasi do të merret me gjithçka që ka të bëjë me riorganizimin e skuadrës për sezonin 2023- 2024 në Superiore. Gjidodaj do të bëjë edhe rolin e drejtorit sportiv, duke u marrë direkt me merkaton, në bashkëpunim me stafin teknik të bluve. Ermal Barushi do të mbajë postin e drejtorit administrativ dhe konsulentit të presidentit Bardhi. Luan Pinari, që deri tani ka qenë pjesë e stafit teknik të trajnerit Dritan Mehmeti, do të marrë detyrën e drejtorit të akademisë së Dinamos. Trajneri Mehmeti është i konfirmuar, ndërsa stafi i tij mund të plotësohet në vazhdim, ku një nga emrat më të përfolur është ai i Ilir Bozhiqit.
PRESIDENTI BARDHI – Ndryshimet te Dinamo i ka konfirmuar për gazetën presidenti i klubit kryeqytetas, Adrian Bardhi, i cili është shprehur: “Po, kemi menduar të bëjmë disa ndryshime në strukturat drejtuese të klubit tonë. Gjidodaj do të ketë një rol drejtuesi më të rëndësishëm te Dinamo, do të bëjë edhe detyrën e drejtorit sportiv, pasi e njeh më mirë këtë punë. Stafi teknik është i konfirmuar, Barushi do të merret me anën administrative të klubit, do të jetë konsulenti im, kurse Luan Pinari do të drejtojë akademinë e Dinamos. Kemi menduar për më të mirën e Dinamos dhe besoj se do të ecim mirë në sezonin e ri. Duam të kemi një skuadër me këmbë në tokë, që të ketë stabilitet mes më të mirëve të futbollit tonë, pastaj të mirat le të vijnë vetë. Ne nuk mund të bëjmë çmenduri në merkato apo të premtojmë paga të larta dhe pastaj të mos i japim ato. Ne jemi një klub solid financiarisht, që paguajmë gjithçka sipas marrëveshjes që bëjmë. Tani kemi edhe kompleksin tonë dhe them se jemi në rrugë të mbarë. Po punohet edhe në drejtim të merkatos për një Dinamo sa më të kompletuar”, ka thënë dje presidenti Adrian Bardhi për “Panorama Sport”.
Objektivi i Dinamos për sezonin e ri është që të jetë një skuadër e mesit të tabelës, pse jo dhe pretendente për të shkuar në Europë. Ashtu siç gazeta ka bërë me dije, blutë duan të mbajnë një profil të ulët, duke e nisur nga poshtë për të shkuar lart. Objektiv paralel, ndërkohë, mbetet rritja e të rinjve dhe përgatitja e tyre për t’u transferuar jashtë vendit.
