Autoritet britanike kanë dënuar me nga dy vjet burg secilin 4 shqiptarët, të cilët janë kapur duke punuar në një “fermë” kanabisi në Skoci.
Mediat vendase raportojnë se bëhet fjalë për shtetasit: Fabio Marku, 28 vjeç, Arjel Lleshi, 24 vjeç, Glevis Xhepa, 26 vjeç dhe Donald Xhepa, 29 vjeç, të cilët ishin arrestuar që më 16 janar të këtij viti në Grampian. Ata kishin kthyer një hotel të braktisur “Huntly Arms” në Aboyne në një “shtëpi bari”.
Të 4 shqiptarët kishin udhëtuar në Mbretërinë e Bashkuar ilegalisht dhe në gjykatë pretenduan se përfunduan duke punuar si “kopshtarë” në kultivimin e madh të drogës për të shlyer borxhet ndaj bandave të krimit të organizuar.
Policia konfirmoi se nuk bëhej fjalë për trafik njerëzor dhe se të katër burrat zgjodhën të punonin në fermën e kanabisit me vullnetin e tyre të lirë.
Operacioni i paligjshëm u zbulua nga një arkitekt. Ai zbuloi se bravat ishin ndërruar dhe, pasi hyri në pronë, gjeti 520 bimë kanabis që rriteshin nën dhjetëra drita në sallën e vjetër të balloit. Katër emigrantët e paligjshëm u gjetën nga policia të njëjtin mëngjes duke qëndruar në një dhomë të hotelit me 50 dhoma gjumi.
Ata u dërguan në dhomat e paraburgimit Kittybreëster, dhe më vonë u njohën me akuzën ndaj tyre. Në përgjigje, Glevis Xhapa i tha policisë: “Kam ardhur në punë vetëm dy ditë më parë, por u desh të largohesha se nuk kishte punë” dhe “kam ardhur këtu vetëm për të punuar, asgjë tjetër”.
Tre të arrestuarit e tjerë nuk kishin asgjë për të thënë në atë kohë. Të dy prej tyre u deklaruan fajtorë për një akuzë të vetme, shpërndarje e lëndëve narkotike.
520 bimët e vogla narkotike arrinin vlerën 220 deri në 810 £ secila në tregun e zi. Së bashku ato mund të shkonin në një vlerë 114,400 deri në 421,200 £ në maturim të plotë.
Patrick Brelhany, avokati mbrojtës i Fabio Marku, i tha gjykatës se klienti i tij kishte udhëtuar ilegalisht në Mbretërinë e Bashkuar dhe kishte rreth 15,000 euro borxh kur iu ofrua punësim në Skoci. Gjykatësja Morag McLaughlin u tha të arrestuarve se të gjithë meritonin të njëjtën masë dënimi.
“Nuk mund t’i imagjinoj rrethanat në të cilat dikush duhet të jetojë për të marrë përsipër rrezikun e ardhjes së paligjshme në këtë vend.
Por sidoqoftë, ligji është i qartë – edhe për ata që punojnë në pozicione të nivelit të ulët në ndërmarrje të tilla si prodhimi i kanabisit. Rezultati është dënim me burg”- tha ajo.
