Nga BoldNews.al
Plot 32 vite më parë, të gjithë anëtarët e byrosë politike dhe komunistët e bindur, i ndryshuan emrin partisë, duke e bërë Partia Socialiste e Shqipërisë. Enveristë, “modernistë të ekstremit të majtë”, neokomunistë, trularë pa qeder dhe personazhe që kishin lyer duart me gjak, u kthyen paptritmas në “të moderuar”, duke synuar rimarrjen e pushtetit edhe në një sistem demokratik.
Por 32 vite më vonë, nuk gjen më komunistë të vjetër dhe të rinj. Fatos Nano, njeriu që mori përsipër të modernizojë “komunistët” e pandreqshëm nuk ishte i pranishëm, as emra të tjerë ish-socialistë me poste të rëndësishme ministrore nuk u dukën gjëkundi. Në krye të partisë, në kremtimin e 32-vjetorit të saj është Edi Rama. Një personazh atipik, që lidhje ideologjike me këtë subjekt politik kishte në të shkuarën komuniste, sidomos me rrënjët familjare dhe farefisnore, por gjeti momentin dhe kohën për të kthyer një “forcë politike të majtë” në një subjekt gjysmë politik e cila quhet Rilindje, pjesë e së cilës janë një specie e veçantë njerëzore, që merr frymë vetëm për të mbajtur pushtet, paçka mjetit që përdor.
Ndër personazhet e vjetër qëmtoheshin vetëm dy, Gramoz Ruçi, ish-sekretar i Përgjithshëm për shumë vite në PS, po ashtu edhe kryetar Kuvendi dhe Namik Dokle, një ish-deputet me bindje të majta, por që kurrë nuk u përfol si të tjerët që ngjyen llërët në afera korruptive. Pjesa tjetër e socialistëve nuk shihen më. Në krye është Edi Rama dhe një enturazh rioshësh që ditën e parë të punës e kanë nisur si deputetë apo edhe ministra.
Ajo që ka ndryshuar në këtë formacion politik është largimi i të ashtëpuajturve “xhaketa të vjetra”. Këto ishin idealistë politikë ku pak prej tyre ndyen duart në korrupsion, por vijuan të shpalosnin idetë e tyre për një Parti Socialiste moderne, që gjithsesi nuk iu përafrua kurrë “Socialdemokracisë Europiane”. Jemi në një fazë të re ku koncepti PS nuk ekziston më. Gropa e thellë iu hap në vitin 2005 kur drejtimin e PS-së e mori Rama, ndërsa “varrosja ideologjike” ndodhi në vitin 2009, ku u trasformua si subjekt politik në program dhe ide, duke u kthyer në një formacion politik pa identitet, por me qëllimin e qartë marrjen dhe më pas mbajtjen e pushteti me çdo çmim.
Në PS-në e sotme nuk gjen më “xhaketa të vjetra”, por personzhe me tuta firmato, luk të çuditshëm me sjellje të çuditshme dhe një qenie e shkëputur tërësisht nga realiteti. Disa nga këta individë që dikur qëndronin në krahët e shefit të madh në përvjetorët e partisë sot shëtisin me tuta në burgjet e vendit, duke mbartur pas mëkatin e vetes, por mbi të gjitha të shokëve të tyre që nga maja deri poshtë në bazë që në një mënyrë apo një tjetër me korrupsion, blerje votash, lidhje me trafiqet dhe kapje të çdo pushteti drejtojnë vendin.
Luksi i madh, forma pompoze e shfaqur edhe në kremtimin e 32-vjetorit të Partisë Socialiste mbetet treguesi se Rilindja po jeton shkëlqimin e saj, me frikën se edhe shuarja mund të jetë e shpejtë, nga momenti në moment, pasi kjo klasë politike drejtuese ka humbur tërësisht realitetin dhe krijuan shkëputje të paimagjinueshme me qytetarët.
Kur dukej që një frymë ndryshe nisi me Fatos Nanon dhe mund të rihapte një kapitull tjetër për PS-së si trashëgimtare e Partisë së Punës, në skenë shfaqet jo rastësisht Edi Rama. Në kremtimin e 32-vjetorit të PS-së ai vinte në kostumin e dhjetë viteve si kryeministër dhe kontrollues absolud i çdo pushteti tjetër të ekzekutivit, legjislativit, gjyqësorit (drejtësisë) dhe medias. Xhaketat e vjetra u zhdukën, por uniformat sportive firmato janë të shumtë, disa po qarkullojnë në burgje…. Nuk është fare çudi që në kremtimin e 33-vjetorit, disa individë që ishin pranë Ramës të mos jenë më, duke kryer “stazhin e partisë” në ndonjë burg, me shpresën për të dalë shpejt për shkaqe “shëndetësore” apo rrethana familjare…!
