Situata në veriun e Kosovës vijon të jetë e tensionuar. Gazetarët të cilët po raportojnë zhvillimet e fundit në komunën e Leposaviçit, janë sulmuar me sende të forta nga persona të maskuar.
Automjetet e A2 CNN, News24, Panorama janë sulmuar dhe thyer nga disa persona të maskuar, të cilët dyshohet se kanë qenë të pranishëm edhe gjatë protestave të djeshme në komunat veriore.
Pesë sulumesit kanë rrezikuar edhe jetën e shoferit i cili ndodhej brenda në makinë.
Gazetari Osman Stafa tregoi se teksa ishte duke raportuar, një grup të rinjsh, rreth 5 persona, të maskuar, kanë goditur makinën.
Gazetari Jul Kasapi raportoi për A2 CNN: “Ne ishim brenda në makinë, kur na sulmuan me gurë. Pas nesh ishte edhe një tjetër automjet i një televizioni shqiptar. Makinat i kemi parkuar shumë larg komunës së Leposaviqit, megjithatë edhe këtu na kanë sulmuar. Në çdo komunë ka pasur të tilla incidente të këtij lloji, ku viktimë kanë rënë media të tjera shqiptare. Forcat e KFOR-it qëndronin pranë nesh dhe sapo panë këta persona të maskuar, u larguan. Këtu nuk ka as prezencë policie. Ishin 4-5 të rinj me maska, me shall që na sulmuan, ndërsa ne ishim të gjithë në makinë brenda”.
Kujtojmë se, në Zveçan, kur nisi përplasja me KFOR-in, ata dolën në rend të parë, duke i sulmuar pjesëtarët e misionit paqeruajtës të NATO-s me mjete plasëse si shok-bomba e koktej molotovi. Si pasojë e sulmeve, mbetën të plagosur mbi 30 ushtarë të KFOR-it.
