Mallorca fiton dhe siguron matematikisht qëndrimin në La Liga për sezonin e ardhshëm. Goli i Vedat Muriqit i dhuroi skuadrës së Aguirre suksesin 1-0 ndaj Valencias.
Goleadori dardan realizoi me kokë në minutën e 64’ pas një krosimi nga e majta të koreanit Kang-In Lee. Vendasit ia dolën të menaxhonin avantazhin e siguruar nga sulmuesi i Kosovës.
Ky ishte goli i 14-të sezonal në La Liga për 29-vjeçarin, i cili barazon me gola Griezmann të Atletico Madrid dhe Unal të Getafes.
Muriqi realizonte edhe në takimin e fazës së parë ndaj Valencias, takim që Mallorca e fitonte 1-2 në “Mestalla”.
Fitorja e sotme ishte e dyta radhazi në ishull për Mallorcan, që është ngjitur në kuotën e 47 pikëve në vendin e 11-të në elitën e futbollit spanjoll.
