Pas tre orësh seancë, Gjykata e Elbasanit ka marr vendimin për të dhënë masën “arrest në burg” për 4 të miturit e arrestuar pas vrasjes së 15-vjeçarit Fatjon Bici në Gramsh.
Në seancën gjyqësore për vlerësimin e masës së arrestit, prokurorja Pranvera Stafa kishte kërkuar burg për 4 minorenët që kishin shkuar për sherr, të pajisur me thika dhe përforcues grushti në ambientet pranë shkollës së viktimës.
Gjyqtari Elton Frashëri pasi dëgjoi provat e paraqitura nga organi i akuzës e ka vlerësuar të ligjshëm arrestin dhe ka vendosur t’i lërë në burg.
Ngjarja ndodhi më 16 maj para shkollës 9-vjeçare “Asllan Shahini, ku 5 adoleshentë u përfshinë në një sherr që përfundoi në përdorimin e thikës. Për pasojë humbi jetën Fatjon Bici dhe u plagos kushëriri i tij, Marko Liçi.
Mësohet se konflikti mes grupit të adoleshentëve kishte nisur dy javë para krimit në një kënd lojërash dhe shkak kanë qenë rrjetet sociale.
