Prokuroria e Elbasanit depozitoi sot në Gjykatë kërkesën për caktimin e masës së sigurisë “arrest në burg” për katër të miturit e arrestuar për ngjarjen e rëndë që ndodhi mesditën e së martës në Gramsh, ku u vra me thikë në zemër 15-vjeçari Fatjon Bici.
Akuzat që rëndojnë ndaj grupit që u përfshi në sherrin e mbyllur me një viktimë, janë “vrasje e kryer në bashkëpunim” dhe “mbajtja pa leje e armëve të ftohta”.
Për ngjarjen u arrestuan në flagrancë katër adoleshentët: Xh. Ç., 15 vjeç, O. Ç, 14 vjeç, E. K., 15 vjeç dhe S. M., 16 vjeç.
E.K. dyshohet se është edhe i riu që goditi me thikë gjatë sherrit bashkëmoshatarin e tij, duke i shkaktuar vdekjen e menjëhershme.
Sakaq, “RTV Ora” ka siguruar dosjen hetimore me dëshmitë e të miturve të përfshirë në ngjarje, ku nënvizohet se autori 15-vjeçar ka pohuar se sherri mes dy grupeve fillimisht ka nisur te fusha e lodrave në Gramsh.
Më pas konflikti është transferuar tek shkolla 9-vjeçare “Asllan Shahini”, ku edhe ka nisur përplasja fizike mes të rinjve, e që u mbyll me vdekjen e njërit prej tyre.
DËSHMIA:
Shtetasi E. Servet. K, ka deklaruar se sot më datë 16.05.2023, ka shkuar në shkollën “4 Dëshmorët”, në fshatin Drizë, si zakonisht, së bashku me tre shokë të cilët quhen S.M, Xh. Ç. dhe H. Ç.
Që të katërt ata, rreth tre muaj më parë janë zënë tek fusha e lodrave, tek makinat elektrike në qytetin e Gramshit, me një grup djemsh ku nga grupi tjetër njeh shtetasin Q.H.
Kur kanë qenë tek fusha e lodrave janë sharë me njëri-tjetrin, gjithashtu edhe herë të tjera kur janë shkëmbyer janë sharë. Konfliktin më shumë Q. e kishte me H.
Ndërsa dy ditë më parë, së bashku me tre shokët e tij, Xh., H. dhe S. kanë vendosur që ditën e sotme të shkonin ta takonim Q. dhe shokët e tij që ta sqaronin një herë e mirë këtë muhabet.
H.me vete kishte marrë një dorezë hekuri ngjyrë gold, Xh. kishte marrë me vete një dorezë hekuri ngjyrë gold, ndërsa ai kishte marrë me vete një thikë që hapej me buton, të cilën e kishte blerë në internet për 1000 lekë të reja dhe një palë dorashka boksi ngjyrë të zezë, ndërsa S. kishte marrë me vete thikë që hapet me dorë dhe një dorezë hekuri.
Pas shkolle, H., S. dhe Xh.i kanë marrë një makinë dhe kanë ardhur në qytetin e Gramshit, ndërsa ai ka shkuar më pas.
Të katërt janë takuar përpara vendit të quajtur Kosturi në Gramsh, ku pasi janë takuar, janë nisur për te shkolla “Asllan Shahini”.
Kur kanë arritur, kanë parë Q. bashkë me shokët e tij, ku mund të ishin shumë persona.
Sapo janë afruar, H. ka filluar të flasë me Q. për të sqaruar debatin, ndërsa njëri nga djemtë që ishte me Q., e ka sharë nga robt. Personin që e ka sharë nuk e ka njohur, por ishte me flokët kaçurrela.
Deklaron se personi me flokët kaçurrela, e ka goditur me grusht në fytyrë dhe në atë moment ai nuk e ka menduar gjatë, pasi i janë errësuar sytë dhe me dorën e djathtë, ka nxjerrë nga xhepi thikën me buton me hapje ngjyrë gri, me të cilën ka goditur personin me kaçurrela.
Shton se nuk mban mend se ku e ka goditur. Pas këtij veprimi, një nga personat e grupit tjetër ka goditur S. me grusht në bark.
Nuk mbaj mend nëse S. ka goditur njeri apo jo por pashë vetëm që S. u godit me grusht në bark.
Pas kësaj grupi tjetër iku për nga shkolla kurse ne të katërt ikëm për nga gjykata dhe më pas na kapi policia tek lumi.
Kur na kapi Policia, H. e kishte hedhur dorezën në tokë para se të na kapte Policia, unë hodha thikën e gjakosur, Xh. kishte hedhur dorezën që kishte dhe Stiveni kishte hedhur thikën e tij.
