Në raportim paraprak për zgjedhjet lokale, OSBE thotë se ka zgjedhjet kanë pasur problematika, por shton se “përgjithësi u administruan mirë, ishin konkurruese” dhe “14 maji ishte një ditë përgjithësisht e qetë”.
Drejtuesja e misionit të vëzhguesve të OSBE-ODIHR, Audrey Glover, në prezantimin e raportit paraprak, tha se rastet e keqpërdorimit të burimeve publike si dhe pretendimet për blerje votash ishin shqetësuese.
Sipas saj, “KQZ ishte transparente, por pati zëvendësime të shpeshta të komisionerëve”.
“Dita e zgjedhjeve ishte përgjithësisht paqësore, por pati ndërhyrje partiake, votim në grup. Vumë re votim familjar në disa qendra votimi dhe kishte persona të cilët gjithashtu s’dinin si të procedonin gjatë votimit”, shtoi Glover.
Po ashtu foli për kërcënime e manipulime.
E pyetur nëse problematikat kanë ndikuar mbi rezultatin përfundimtar, ajo tha se “do shihen çfarë çështjesh do sillen para gjykatës në mënyrë që të sigurohet që rezultatet kanë qenë të sakta”.
Një tjetër përfaqësues i OSBE-së u shpreh se “është e vështirë të përcaktojmë nëse ishin zgjedhje të drejta”.
