Gara elektorale për bashkinë e Kuçovës ka qenë një prej më të luftuarave në këto zgjedhjet lokale, teksa mes presioneve mbi administratën dhe blerjes masive të votës të denoncuar nga koalicioni opozitar, kandidati i “Bashkë Fitojmë” Lefter Maliqi humbi për vetëm 682 vota përballë kryebashkiakut aktual, Kreshnik Hajdari.
Maliqi në reagimin e parë nga KZAZ-ja në Kuçovë ku procesi u mbyll me tensione, e quajti rezultatin të manipuluar, duke vendosur theksin te blerja e tyre nga deputeti socialist Bardhyl Kollçaku dhe oligarku Pëllumb Salillari.
Ai akuzoi edhe ministrin e Brendshëm, Bledi Çuçi, Policinë e Shtetit dhe strukturat e tjera të shtetit, duke i bërë bashkëfajtore në manipulimin e rezultatit, ndërsa në një postim pas shpalljes së rezultatit final, thekson se këto shkelje do t’i dorëzohen të dokumentuara OSBE/ODIHR-it.
Maliqi thekson se ai dhe qytetarët e Kuçovës e fituan betejën e tyre dhe për herë të parë treguan se janë të lodhur nga socialistët në pushtet, ndaj votuan pro ndryshimit.
Si një bastion i majtë, në një garë që ndahet me më pak se 700 vota, ndryshe nga proceset e shkuara zgjedhore, Kuçova i dha të majtëve mesazhin e fortë të shporrjes dhe thyerjes së pushtetit të tyre.
Ndër të tjera në reagimin e tij, Maliqi nënvizon se do t’i shkojë deri në fund këtij procesi duke kërkuar hetim nga SPAK dhe ndërkombëtarët për këtë mashtrim të madh elektoral.
REAGIMI I MALIQIT:
Të dashur miq, njerëz me vlera të Kuçovës që më besuat e votuat, NE FITUAM!
Ne fituam betejën e drejtë, fituam garën e moralshme, të besës dhe mbështetjes të çdo banori të ndershëm që kërkoi me bindje ndryshimin.
Manipulatorët, të panikosur nga humbja filluan manovrat e vjedhjes, puçit dhe të tjetërsimit të votës.
E vërteta triumfoi, KUÇOVA NUK ËSHTË E PS, KUÇOVA NDRYSHOI, KUÇOVA HYRI NË HISTORI!
Garantoj, zotohem dhe ju premtoj me të gjithë qënien time se ky rezultat do të zbardhet shumë shpejtë, kjo është dhëmb për dhëmb deri në frymën e fundit, pasi oligarkët vodhën SHPIRTIN tuaj të PASTËR!
Të gjitha provat, faktet e ordinerëve po i publikojmë, çdo ditë, deri sa Kuçova të vij në duart tuaja ashtu siç ma besuat e dorëzuat dje me votën tuaj!
I bëj thirrje SPAK, ndërkombëtarëve, OSBE se ky është mashtrimi më i madh elektoral i bërë ndonjëherë, TË MEREN MASAT! Ne nuk ndalemi, ne nuk dorëzohemi dhe do t’i shkojmë deri në fund kësaj beteje të orkestruar nga Oligarku Salillari, kryemashtruesi dhe dështaku Çuçi në krahë të milingonës Hajdari.
Mesazhin e morët. KUÇOVA JU SHPORRI, KUÇOVA JU THEU, KUÇOVA DO NDRYSHIMIN!
Faleminderit dhe mirënjohje çdokujt që qëndroi me mua në këtë betejë që sapo nisëm bashkë. Do të jem këtu me ju ditë e natë, çdo orë që kalon deri sa ta zbardhim të vërtetën dhe kërkesën tuaj, madje deri sa të dorëzojmë në qeli të gjithë organizatën mafioze që ndërhyri në këtë proçes!
Faleminderit
Lefter Maliqi!
