Me një rezultat të ngushtë, kandidati i Partisë Socialiste, Kreshnik Hajdari ka siguruar një tjetër mandat në bashkinë e Kuçovës.
Kandidati i koalicionit opozitar “Bashkë Fitojmë” në Bashkinë e Kuçovës, Lefter Maliqi, e quajti rezultatin të manipuluar.
Maliqi deklaroi se votat janë manipuluar nga deputeti socialist Bardhyl Kollçaku dhe oligarkët. Ai akuzoi edhe Policinë e Shtetit dhe strukturat e tjera të shtetit, duke i bërë bashkëfajtore në manipulimin e rezultatit.
Maliqi shtoi se ai ka vënë në dijeni për të gjitha këto shkelje edhe OSBE/ODIHR-in, ndërsa tha se do t’i shkojë deri në fund kësaj beteje, duke mos u dorëzuar deri në daljen e rezultatit real.
“Unë kam fituar moralisht. Ça s’bënë. Blenë vota me lekë, oligarku Pëllumb Salillari. Gjithë policia, gjithë shteti, në orën 12 të natës fiknin dritat, lëviznin, e me radhë. Unë banorëve të Kuçovës i jam shumë mirënjohës. Hera e parë që thyej këtë bastion të majtë. Pavarësisht se çfarë ndodhi, kam një besim që nuk largohem nga beteja derisa të largoj të korrupruarit dhe të këpus falangat e krimit. I kam bërë denoncimet deri në OSBE ODHIR. Vetëm provokime. Edhe këtu vetëm provokime. Rasti i parë në Shqipëri që KZAZ mbyllet gati 40-50 minuta. Ikin s’do do lahemi, jo do bëhemi’. Ndërkohë që njerëzit prisnin jashtë. Ku di unë se çfarë është bërë me këta. Këtë kishin gjithë policinë. Dyshoj manipulim. Për mua është manipulim. Për mua është manipulim i hapur. Nuk ka asnjë problem. Duartrokitjet e mia janë për banorët e Kuçovës që janë vjedhur”, tha Maliqi ndër të tjera.
