Kandidati i koalicionit “Bashkë Fitojmë” i ka bërë thirrje qytetarëve që të ushtrojnë të drejtën e votës për të sjellë ndryshimin në kryeqytet.
Gjatë një dalje publike në selinë blu, Këlliçi u rikujtoi qytetarëve 5 pikat dhe premtimet e tij për t’i kthyer në realitet pas 14 majit. Ai tha se kjo është një ditë e veçantë dhe se pjesëmarrja e qytetarëve ka rëndësi të veçantë.
“Ushtroni detyrën tuaj si qytetarë, dilni dhe votoni. Nëse doni të keni autobusin falas pas 14 majit, nëse doni oazet e gjelbërta, dilni dhe votoni masivisht. Pjesëmarrja juaj ka rëndësi të veçantë. Kushtet atmosferike nuk janë më të mirat, por është e rëndësishme që qytetarët e Tiranës, të dalin në qendrat e votimit për të bërë ndryshimin”, tha Këlliçi.
Kujtojmë që prej mëngjesit të sotëm qindra qytetarë nuk arritën që të votonin në mëngjes për shkak të defekteve teknike të pajisjes për identifikimin elektronik. Për ironi të fatit edhe kreu i KQZ-së, megjithëse institucioni që ai përfaqëson ka investuar mbi 30 milionë euro për këto pajisje, Ilirjan Celibashi nuk arriti që as vetë që të votonte. Gjithashtu edhe në Surrel në qendrën e votimit kur merrte pjesë Edi Rama, për më shumë se dy orë nuk punonte pajisja e identifikimit elektronik duke detyruar qindra qytetarë të largohen pa votuar.
Pjesëmarrja deri në orën 15:00:
29.51% e qytetarëve kanë ushtruar të drejtën e votës deri në orën 15:00, sipas të dhënave të raportuara nga Komisioneri Qendror i Zgjedhjeve.
Nga 5 211 qendra votimi në total, raportimet vijnë nga 2 592 qendra.
550 812 zgjedhës kanë votuar nga 1 866 477 zgjedhës në listat e qendrave të votimit të raportuara.
