Taulant Malaj ka gënjyer hetuesit italianë, kur në dëshminë e tij parprake tha se vrau gabimisht të bijën 16-vjeçare, Jessica, pasi kjo e fundit doli përpara tij për të mbrojtur të ëmën, Tefta Malaj.
Dosja hetimore e autoriteteve italiane tregon se ka prova që tregojnë se 45-vjeçari ishte i vetëdijshëm për krimin që po kryete. Këto prova kundër bukëpjekësit shqiptar që vrau vajzën e tij dhe italianin 51-vjeçar Massimo De Santis natën mes të shtunës dhe të dielës së kaluar janë konsoliduar pasi u kontrolluan kamerat e vendosura nga ai në shtëpi.
Ato kanë filmuar skenat në të cilat burri godiste vazhdimisht gruan dhe vajzën e tij me një vullnet të qartë vrastar.
Dokumenti zyrtar hetimor, i publikuar nga Ansa, evidenton qartë se sa i përket vrasjes së Xhesikës, “e cila me guxim u përpoq në çdo mënyrë dhe deri në fund për të mbrojtur nënën e saj nga agresioni brutal i të atit”, rezulton se “goditjet i janë shkaktuar edhe asaj vullnetarisht, përballë, jo vetëm kur ndërhyri për herë të parë në dhomën e gjumit, por edhe kur agresioni vijoi në sallon”.
Vajza 16-vjeçare ka marrë katër goditje thike në gjoks, pranë organeve vitale.
“Në të njëjtën mënyrë mund të shohim kokëfortësinë me të cilën ai sulmon gruan e tij duke e befasuar në mes të natës teksa ajo është në shtrat, duke lëshuar goditje të shumta me thikë edhe në pjesën e sipërme të trupit. E gjithë kjo ka ndodhur nën sytë e djalit më të vogël të çiftit”, thuhet në dokument.
Sipas hetuesve “metodat brutale të realizimit të fakteve tregojnë tek i dyshuari një pandjeshmëri absolute ndaj jetës njerëzore dhe një prirje të përbashkët për krime si mjet për të vërtetuar bindjet e tij dhe rolin e tij në të gjithë familjen“.
Ndërkohë, në dëshminë e tij Malaj ishte mbrojtur duke thënë: “Hyra në dhomën e gjumit ku ishte gruaja ime. E godita dhe ndërkohë hyri Xhesika, duke dashur ta mbronte nënën e saj. Kështu që unë godita edhe Xhesikën dhe e vrava. As që e kuptova se ishte ajo. Fatkeqësisht, Xhesika e gjeti veten në kohën e gabuar. Të dy u arratisën nga shtrati në kuzhinë, ku unë vazhdova t’i godisja”.
Raportohet se Malaj përdori një thikë të gjatë 18 cm për të kryer krimin makabër.
Gruaja e vrasësit, Tefta Malaj, e cila i mbijetoi atentatit pasi mbrohej nga Xhesika, ka bërë thirrje për ndihmë. Teksa telefonoi numrin 118 Tefta i përsëriti “thikë”, dhe kur operatori e pyeti nëse ishte goditur me thikë, gruaja mezi mundi të përgjigjej “po” dhe më pas shtoi: “vajza ime, vajza ime”.
