Një aksident i rëndë është regjistruar në orët e vona të mbrëmjes së sotme në “Unazën e Madhe” të Tiranës.
Bëhet me dije se një automjet tip “Hyundai” me targa “CD” i ambasadës së Rusisë, është përplasur me këmbët e njërës prej urave të mbikalimeve në aksin që të çon nga Sauku në drejtim të autostradës Tiranë-Elbasan.
Nga pamjet duket që automjeti i aksidentuar ka pësuar dëmtime të mëdha nga përplasja e fortë dhe ka përfunduar pranë bordurave anësore të rrugës.
Paraprakisht dyshohet se automjeti i aksidentuar ka qenë me shpejtësi tej normave të lejuara dhe dyshohet se në vendngjarje ka humbur jetën një person dhe një tjetër ka mbetur i plagosur.
Në vendin ku ka ndodhur aksidenti krahas policisë dhe autoambulancës, ndodhet edhe shërbimi zjarrfikës që po punon për nxjerrjen e trupave nga makina e shkatërruar.
