Një 35-vjeçar i shpallur në kërkim për marrëdhënie seksuale me të mitur dhe përndjekje është arrestuar në Dimal.
Në pranga u vu Aljon Pasho.
“Shërbimet e Policisë Dimal kishin siguruar informacione se një shtetas i shpallur në kërkim nga Komisariati i Policisë Sarandë ishte strehuar në një banesë në qytetin e Dimalit. Bazuar në këto informacione shërbimet e Stacionit të Policisë Dimal, në bashkëpunim me Forcën e Posaçme ‘Shqiponja’, pas koordinimit të informacioneve me Komisariatin e Policisë Sarandë, kanë kapur dhe vënë në pranga shtetasin Aljon Pasho, 35 vjeç, banues në Sarandë, i cili ishte strehuar në banesën e një të afërmi të tij”, njoftoi policia.
Në vitin 2018, në qytetin e Sarandës, Aljon Pasho ka përndjekur një shtetase të mitur 13 vjeçe në atë kohë dhe më pas ka kryer marrëdhënie seksuale me të, shtuan të njëjtat burime.
35-vjeçari ishte shpallur në kërkim pasi Gjykata e Rrethit Gjyqësor Sarandë e ka dënuar me 4 vjet e 5 muaj burgim, për veprat penale “Marrëdhënia seksuale ose homoseksuale me të mitur” dhe “Përndjekja”.
