Policia në Qafë-Thanë ka vënë në pranga një 37-vjeçar nga Pogradeci, i cili ka tentuar të kalojë ilegalisht në drejtim të Maqedonisë, një 15-vjeçare.
Mësohet se i arrestuari është shtetasi Jani Karriqi. Ai u ndal gjatë kontrolleve të ushtruara nga shërbimet e Policisë Kufitare në kufirin e gjelbër me Maqedoninë.
Sipas policisë, ai ka tentuar që të kalonte të miturën në mënyrë të paligjshme drejt territorit të vendit fqinj, kundrejt pagesës.
Në cilësinë e provës materiale u sekuestruan një sasi eurosh, një celular dhe një automjet në pronësi të tij, me të cilin dyshohet se do të transportonte të miturën.
Vijon puna për identifikimin dhe vënien përpara përgjegjësisë ligjore të shtetasve të tjerë, të dyshuar të implikuar në këtë rast.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
