Gjykata e Posaçme ka vendosur këtë të mërkurë që të urdhërojë konfiskimin e disa pasurive të Altin Çuçaj, një personazh i botës së krimit që së bashku me të vëllanë Mikel Çuçaj, rezultojnë të dënuar me nga 14 vite burg secili për trafik droge në Torino të Italisë.
Ata u vunë në shënjestër të operacionit “Forca e Ligjit” në shkurt të 2020-ës, ku ju kërkuar deklarimi i pasurisë.
Vëllezërit Çuçaj zotërojnë disa biznese të mëdha, kompani e pika karburanti të firmës ‘Eida’, me vendndodhje në Radhimë, Orikum, Bestrovë dhe Vlorë.
Altin Çuçaj zotëron dhe administron një hotel gjigant me pishina në Radhimë me emrin “Coral hotel & resort”.
Çuçaj ka gjithashtu në pronësi një kompani që merret me prodhimin dhe përpunimin e mermerit dhe gurit, me emrin “MERMER V.A 2017”. Këtë kompani, Altin Çuçaj e bashkë administron me ortakun e tij të identifikuar si Vendim Durmishaj. Altin Çuçaj ka gjithashtu edhe pika karburantesh të firmës “Eida”, në Qafë Bestrovë, dhe godina të ndryshme në qendër të Vlorës, në fshatin Bestrovë apo edhe në aksin rrugor Vlorë-Fier, ku bën import dhe eksport me shumicë e pakicë të artikujve industrialë, ushqimore, hidrosanitare, elektrike, elektroshtepiake, etj.
Ndërsa Mikel Çuçaj, rezulton të jetë gjithashtu pronar i dy bizneseve. Në njërën prej tyre ai është bashkëpronar me shumë persona të tjerë, në linjën “Interbuz Vlora”.
Mikel Çuçaj është gjithashtu edhe pronar i një bar kafeje në Vlorë, në rrugën nacionale Vlorë-Himarë.
Dy vëllezërit Çuçaj kanë edhe një vëlla tjetër të identifikuar si Besnik Çuçaj, në pronësi të të cilit janë dy trualle dhe ndërtesa, por edhe një automjet që GJKKO po ashtu ka vendosur t’i konfiskojë,
Besnik Çuçaj është pronari i hotelit “Roi” në Vlorë, por në adresë të tij nuk ka shkuar ndonjëherë formulari i OFL-së dhe i ka shpëtuar sitës së vetëdeklarimit të pasurisë.
Njoftimi i GJKKO:
Në zbatim të Aktit Normativ Nr. 1, datë 31.01.2020, Gjykata e Posaçme e Apelit për Korrupsionin dhe Krimin e Organizuar me vendimin nr.53 datë 13.04.2023 ka miratuar vendimin nr.19/99 datë 09.05.2022 të Gjykatës së Shkallës së Parë për Korrupsionin dhe Krimin e Organizuar.
Me këto vendime, Gjykatat (me kërkesë të Prokurorisë së Posaçme) kanë vendosur konfiskimin e pasurive të shtetasit Altin Çuçaj (i dënuar për veprat penale të parashikuara në nenet 284/a dhe 333/a të Kodit Penal Shqiptar) dhe personave të lidhur me të si më poshtë:
- Pasuri e paluajtshme, lloji i pasurisë “Truall” me sip. 902 m² dhe ndërtesë me sip.168 m², ndodhur në Vlorë në pronësi të shtetases A. Kondo.
- Pasuria e paluajtshme, lloji i pasurisë “Truall” me sip. 105.6 m² dhe ndërtesë me sip.105.6 m², ndodhur në Vlorë, në pronësi të B. Çuçaj.
- Pasuria e paluajtshme, lloji i pasurisë “Truall” me sip. 500 m² dhe ndërtesë me sip.183 m², ndodhur në Vlorë, në pronësi të B. Çuçaj.
- Pasuria e paluajtshme, lloji i pasurisë “Truall” me sip.151 m² dhe ndërtesë me sip.62 m², ndodhur në Vlorë,në pronësi të M. Çuçaj.
- Pasuri e luajtshme autoveturë, marka “Daimler Chrysler”, modeli “C270CDI”, në pronësi të A. Çuçaj.
- Pasuri e luajtshme autoveturë, marka “Ford”, modeli “KUGA”, në pronësi të E. Çuçaj.
- Pasuri e luajtshme autoveturë, marka “Mercedes Benz”, modeli “E350CDI”, në pronësi të M. Çuçaj.
- Pasuri e luajtshme autoveturë, marka “TOYOTA”, modeli “YARIS”, në pronësi të M. Çuçaj.
- Pasuri e luajtshme autoveturë, marka “Daimler Chrysler”, modeli “ML320CDI”, në pronësi të B. Çuçaj.
