Një rrjet i narkotrafikut në Breshia të Italisë, që kishte në bërthamën përbërëse disa shqiptarë është çmontuar nga karabinierët e Chiarit, duke arrestuar 6 persona që akuzohen për shitje droge.
Grupi në fjalë kishte arritur deri në mbi 100 mijë euro fitime në muajt e fundit, falë tregtisë së dorgës të kryer në qytetin e Franciacorta, Palazzolo dhe në komunat fqinje.
Bastisja e pronave të 8 të dyshuarve u krye me ndihmën e qenve nuhatës së njësisë Casatenovo mëngjesin e së martës, 2 maj.
Nga kontrollet e kryera në banesat e tyre është bërë i mundur sekuestrimi i 150 gram kokainë dhe 190 gram hashash, me një vlerë totale rreth 10 mijë euro; sasi këto që u shtohen atyre tashmë të sekuestruara gjatë hetimit, i cili filloi në prill të vitit të kaluar.
Gjashtë persona u ndaluan
Gjashtë të ndaluarit, 5 burra dhe një grua, u prekën nga masat paraprake, por dyert e burgut u hapën vetëm për njërin prej tyre.
Ai është shqiptari Bekim Berisha (41 vjeç) dhe mban përgjegjësi për organizimin e rrjetit si dhe akuzohet për grabitje dhe armëmbajtje pa leje. Berisha, është shqiptar i lindur në Breshia dhe banues në Chiari.
Ndërkohë, gjykata ka vendosur masën e sigurisë “arrest në shtëpi” për një 42-vjeçar me origjinë shqiptare me banim në Këln të Gjermanisë, për një 49-vjeçar nga Chiari që mbetet nën hetim dhe së fundi për një 29-vjeçar nga Rovato.
Ndërkohë, masa detyrim paraqitje u vendosur për një 23-vjeçar me origjinë marokene dhe një 28-vjeçar, po ashtu banues në Rovato.
Operacioni, nisi pas denoncimit të bërë në prill 2022 nga 49-vjeçari nga Chiari. Ai ishte trembur nga kërcënimet e përsëritura të Berishës, i cili prej vitesh e furnizonte me kokainë dhe për llogari të të cilit kishte nisur edhe trafikun e drogës, ndaj i ishte drejtuar karabinierëve.
41-vjeçari shqiptar kishte vënë re se shitësi i tij po merrte dhe mbante për vete pjesë të dozave të kokainës që duhet t’u shiste klientëve, duke e zëvendësuar sasinë e hequr me manit.
Në atë moment Berisha i ka kërkuar 49-vjeçarit kthimin e 2000 eurove, madje duke e kërcënuar me armë.
“Do të t’i bëj copa gjunjët”, – dyshohet se i tha Berisha për t’a frikësuar personin që punonte për llogari të tij, në mënyrë që t’a bindte që t’i kthente paratë.
Në atë moment, 49-vjeçari i ishte drejtuar karabinerëve dhe megjithëse më vonë e tërhoqi denoncimin, hetimet kishin nisur për grupin.
Gjatë muajve të aksioneve e përgjimeve, u arrit të kuptohej si funksiononte grupi dhe u identifikuan dhjetëra konsumatorë, duke kuptuar edhe përgjegjësitë e secilit prej të dyshuarve në trafikun e drogës.
