Kandidati i koalicionit “Bashkë Fitojmë” për Bashkinë e Vorës Indrit Hoxha kallëzoi sot në SPAK tenderin me vlerë 2.3 milionë euro të pastrimit për këtë bashki, duke akuzuar krye bashkiakun Blerim Shera për përvetësim të fondeve publike.
Në një deklaratë për mediat, ai i bëri thirrje SPAK që të nis hetimet dhe kërkoi që përgjegjësit të dalin para drejtësisë, e po ashtu kërkoi që të nisë sekuestrimi i dokumenteve të bashkisë për të zbuluar abuzimet.
Ndërkohë, në studion e “Neës24”, Hoxha zbuloi edhe detaje në lidhje me kallëzimin që depozitoi sot në SPAK, duke thënë se Blerim Shera vitin e kaluar jetonte në shtëpi me qira, ndërsa sot kur bëhet një vit nga marrja e detyrës, zotëron 4 apartamente.
Po ashtu ai theksoi se sapo të vijë në pushtet, zyrat e Bashkisë së Vorës, të cilat janë transferuar në ambiente luksoze, që paguhen nga qytetarët përmes taksave, do të shkojnë atje ku ishin më parë.
“Ne po përgatisim një raport dhe për diplomatët e huaj në vend. Vora nuk ka luks këto zyra. S’jemi bashkia e Parisit. Nuk dihet se ku janë zyrat e bashkisë së Vorës, kanë marrë zyra me qira. Një zyrë është në një cep të qytetit, tjetra në cep tjetër. Këto rëndojnë xhepat e qytetarëve. Dita e parë që do të vijë në pushtet, do të kthej atje ku ishte bashkia e Vorës. Këta e kanë falimentuar bashkinë e Vorës. Ça përpara janë këta? Këta janë buzë greminës. SPAK të hetojë pasurinë time dhe të kryetarit të bashkisë së Vorës. Ai kur mori detyrën ishte në shtëpi me qira, tani ka 4 apartamente në Vorë. Kryetari i bashkisë së Vorës po bën presion qytetarëve. Familjet që presin të marrin apartamentet sa i takon projektit të rindërtimit, po iu bëhet presion, ku iu kërkohet vota”, u shpreh kandidati i koalicionit “Bashkë Fitojmë”.
Sipas Hoxhës, kompania që ka përfituar tenderin është në pronësi të ish-deputeti socialist Sadri Abazi, por mbeturinat nuk pastrohen rregullisht në Vorë dhe koshat janë të tejmbushur.
“Bëhet fjalë për një procedurë tenderimi e kryer në 2022-in mes bashkisë së Vorës dhe një kompanie, Acko impeks. Jo vetëm që ka shkelje procedura, por janë dhe 9 procedura të tjera që do i kallëzojmë në SPAK. Vlera e abuzimeve është 16 mld lekë, për disa çështje. Po ashtu është dhe një tender për pastrimin në mënyrë emergjente në Vorës, sikur kjo bashki të kishte ndonjë virus. Vora tashmë është bashkia më e pistë. SPAK duhet të zbarkojë në zyrat e bashkisë, të nisë hetimin e thelluar, që të çojë para përgjegjësisë, përgjegjësit. Bashkia e 61 sa i takon pastërtisë. Ne disponojmë studime dhe dokumente sa i takon këtyre shkeljeve. Kompania në fjalë nuk është vënë në lëvizje, nuk ka pastruar asnjëherë. Koshat e mbeturinave janë të tejmbushur. Kompaninë e drejton Sadri Abazi. Për mua ka rëndësi shkelja që ka bërë kryetari i bashkisë”, tha Hoxha.
