Sipas Partisë Demokratike, mazhoranca ka nisur në Elbasan tentativat për blerjen e votave.
Sekretari i Përgjithshëm i PD-së, njëkohësisht edhe i deleguari politik në Qarkun e Elbasanit, Flamur Noka i ka bërë thirrje sot Edi Ramës që të ndalojë operacionin e tij për blerjen e votave.
Noka tha se të braktisur dhe të refuzuar nga qytetarët dhe në panik nga humbja në 14 maj në Elbasan, Edi Rama ka ngritur grupin e blerjes së votave, të përbërë nga zyrtarë të bashkisë së Elbasanit.
Ai përmendi dhe emra të disa prej tyre.
Noka i bëri apel SPAK-ut të nisë hetimet për çështjen, ndërsa deklaratën e mbylli duke shprehur bindjen se Luçiano Boçi do të jetë kryebashkiaku i ri i Elbasanit që do të dalë nga zgjedhjet e 14 Majit.
Deklarata
“Në panik se njerëzit i kanë braktisur dhe po i refuzojnë kudo, në çdo lagje të qytetit të Elbasanit, apo njëri administrative, Edi Rama ka urdhëruar Damjanin të bëjë gati platformën e vjedhjes dhe manipulimit të zgjedhjeve. Të refuzuar dhe të përbuzur ata kanë shpresën tek zbatimi i skemës kriminale, dhe të njohur, të vjedhjes së zgjedhjeve. Koalicioni ‘Bashkë Fitojmë’ disponon të gjithë të dhënat që zyrtarët e Bashkisë Elbasan, nën mbrojtjen e Damian Gjiknurit, po bëjnë gati grupin e gatshëm për blerjen dhe manipulimin e votës. Personat e përfshirë në këtë skemë kriminale të shpërndarjes së parave koalicioni ‘Bashkë Fitojmë’ i ka identifikuar, ata janë publikë, ata janë drejtorë të Bashkisë Elbasan”, tha Noka në një deklaratë nga selia blu.
Ai përmendi me emra edhe drejtorët e bashkisë që sipas tij janë përfshirjen në blerjen e votave.
“Me moton ‘paratë në këmbim të votave’ në Bashkinë Elbasan po hidhen në veprim me thasë në dorë:
- Leli Kraja-Administrator i EcoAlb (shoqërisë që i shërben Inceneratorëve).
- Andri Mehja-Drejtor i INUK, Bashkia Elbasan.
- Ergys Kateshi-Drejtor i Doganës Elbasan
- Gentian Darzeza-Punonjës i Bashkisë Elbasan.
- Astrit Muzhaqi-Punonjës i Bashkisë Elbasan.
- si dhe Mehmet Peqini”, deklaroi Noka.
Më tej, shtoi se koalicioni ‘Bashkë Fitojmë’ është kujdesur që në Elbasan të bëjë një fushatë të qetë, pa incidente dhe qytetare, ashtu siç kundër se është edhe kandidati ynë i dalë nga primaret, dhe pasi jemi të sigurt te fitorja e Luçiano Boçit.
“I bëjmë thirrje të menjëhershme Partisë Socialiste, dhe drejtpërdrejt Edi Ramës që të tërheqë ekipin e hajdutëve të votës, pasi po monitorohen dhe nuk do të lejohen në skemën e tyre të vjedhjes. Ta harrojnë se demokratët dhe qytetarët e Elbasanit do të qëndrojnë duarkryq. Ta harrojnë se ata do të mund të tjetërsojnë fitoren tonë në Elbasan. Çdo njeri që implikohet në këtë skemë kriminale do të ketë përgjigje. I bëjmë thirrje të menjëhershme, institucioneve të ligjit dhe rendit të mos bëjnë spektatorin përballë këtyre skenave por të marrin përgjegjësitë që u ngarkon ligji”, shtoi.
Po ashtu, i bëri apel SPAK-ut të marrë nën hetim personat e mësipërm, si “zbatuesit e projektit të blerjes dhe tjetërsimit të votës në Elbasan”.
“Neni 328/a e Kodit Penal e thotë qartë se; ‘përdorimi i pozicioneve publike në funksion të fushatave zgjedhore dënohet me burg’. Sikundërse shpërndarja e parave për të blerë votën, është krim elektoral dhe dënohet me burg. Një gjë duhet ta ketë të qartë Edi Rama që e ka siklet të madh Elbasanin, ku brenda 10 ditësh ka ardhur 3 herë. Asnjë presion, asnjë shantazh asnjë blerje vote nuk do ta shpëtojë Edi Ramën dhe rilindjen nga humbja e sigurtë që e pret në Elbasan, më 14 maj. Edi Rama e di mirë, prandaj po vjen shpesh në Elbasan. E di mirë se shpresa për fitore i ka humbur dhe për të shmangur humbjen, po bën gjithçka për të tjetërsuar vullnetin nëpërmjet parave të korrupsionit. Qytetarët e Elbasanit e kanë marrë vendimin. Luçiano Boçi do të jetë kryetar i ri i Bashkisë Elbasan mbrëmjen e 14 majit. Fitorja nuk ndalet, të ruajnë dhe të bëjnë kujdes sepse nuk do të mund ta ndalojnë fitoren e Luçiano Boçit”, përfundoi Noka.
Mazhoranca mohon akuzat
Pas deklaratës së Nokës, ka reaguar drejtuesi politik i PS në Elbasan, Damian Gjiknuri i cili ka mohuar akuzat.
Sipas tij, opozita po përgatit alibinë e humbjes.
“Dega e Foltores në Elbasan ka valëvitur sot Flamurin me akuza bombastike për blerje e shitje votash. Për të qeshur e për të qarë! Po bëjnë fiks atë që unë e kam paralajmëruar e thënë prej disa ditësh në çdo takim me qytetarë të Elbasanit. E kam thënë qartazi se trajektorja e sjelljes së foltores në Elbasan do kalojë në disa faza. E para, faza e euforisë dhe thashethemnaja që përhapën se Gledian Llatja nuk do të rikandidohej për një mandat tjetër. Dolën blof! E dyta, thellimi i euforisë teksa hërhapën thashethemnajën sikur Edi Rama e paska lëshuar Elbasanin në tavolinë për Berishën dhe Metën. Sigurisht dolën blof! E treta, kaluan tek faza e premtimeve tullumbace me sheshxhirime filmash e Disney Land apo kompani fantazma që do të investonin qindra miliona euro. Lan nam! Tanimë kemi mbërritur tek faza e katërt, përgatitja e alibisë së humbjes! Pasi e kanë kuptuar se humbjen e kanë të sigurtë, kanë filluar të akuzojnë se gjoja po ua vjedhin votat”, shkroi ai në një postim në rrjetet sociale.
“Nuk ka asgjë që e ndal Elbasanin! Elbasani në 14 Maj do të vendosë qartazi të ndahet njëherë e mirë nga e shkuara, nga ata që nuk pranojnë vullnetin e zgjedhësve dhe refuzojnë të njohin humbjen! Inkurajoj plotësisht çdo institucion ligjzbatues përfshirë dhe SPAK-un të vëzhgojë nga afër sjelljen e çdo individi në Elbasan para, gjatë dhe pas procesit zgjedhor! Veçanërisht kërkoj monitorimin e familjarëve të Luçiano Boçit të cilët lëvizin natën me çanta nëpër shtëpitë e qytetarëve! Elbasani as nuk shitet, as nuk blihet! Elbasani ecën vetëm përpara! Kurrë më mbrapa”, shtoi.
