Lekë Vuksani, 34-vjeçari që ekzekutoi me armë zjarri Petrit Vuksanin pas konfliktit për qiranë e banesës në pronësi të 51-vjeçarit, është arrestuar nga policia 21 orë pas ngjarjes së rëndë që tronditi Shkodrën.
Forcat e policisë mundën ta lokalizonin dhe arrestonin autorin e krimit në një banesë në rrugën “Pjetër Budi”, ku ai kishte gjetur strehë pasi kishte kërcënuar me jetë pronaren.
Mësohet se për kapjen e 34-vjeçarit kanë dhënë informacion edhe qytetarët, të cilët kanë njoftuar policinë për një person që qarkullonte i armatosur në rrugë të ndryshme të Shkodrës.
Autori ka lëvizur në këmbë dhe gjatë gjithë kohës ka patur me vete armën kallashnikov, me të cilën i mori jetën 51-vjeçarit.
Njoftimi i policisë:
Strukturat operacionale të DVP Shkodër dhe ato të Komisariatit të Policisë Shkodër, në bashkëpunim me Forcën Speciale RENEA, pasi 21 orësh, si rezultat i kërkimeve dhe ndjekjes së pandërprerë policore, me mbështetjen e informacioneve të siguruara nga inteligjenca informative, kanë bërë të mundur lokalizimin, kapjen dhe vënien në pranga të shtetasit L. V., 34 vjeç, banues në Shkodër.
34-vjeçari u lokalizua në banesën e një shtetaseje, në rrugën “Pjetër Budi”, Shkodër, banesë në të cilën kishte mundur të strehohej pasi gjatë natës kishte kërcënuar pronaren e kësaj banese për t’i hapur derën dhe për të mos kallëzuar.
Gjithashtu, në të njëjtën banesë, u gjet edhe arma e zjarrit automatik me të cilën dyshohet se autori kreu vrasjen.
Shtetasi L. V. dyshohet se rreth orës 12:15, të ditës së djeshme, në lagjen “Tom Kola”, vrau me armë zjarri automatik, në banesë, shtetasin P. V., 51 vjeç.
Grupi hetimor, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Shkodër, vijon punën për dokumentimin e plotë ligjor të këtij rasti.
