Atleti shqiptar Izmir Smajlaj ka qenë i pezulluar me një afat të papërcaktuar si shkak i një manipulimi të rezultatit, por këtë nuk e ka bërë ai dhe Gjykata Sportive Botërore e ka shpallur të pafajshëm dhe mund të vijojë garën e kërcimit së gjati, ku ai është shpallur edhe kampion Ballkani.
Për manipulimin e rezultatit është shpallur fajtor presidenti i federatës së atletikës, Gjergj Ruli, që është dënuar me 5 vjet pezullim, si dhe sekretari i federatës, Nikolin Dionisi, me 4 vjet.
Pas vendimit, sot ka reaguar vetë Izimir Smajlaj, duke thënë se “i drejti nuk mposhtet kurrë”.
“Falë një beteje të gjate ligjore me AIU, Sport Resolution (ose Gjykata Sportive Botërore) me seli në Londër, ka shpallur PA-FAJESINË time kundrejt aludimeve për mashtrim ndaj një gare ku isha pjesëmarrës.
Isha i bindur që gjyqtarët e huaj do të vlerësonin të vërtetën dhe do kuptonin që çdo gjë që ishte hetuar ishte e gabuar dhe pa fakte ndaj meje, andaj jam tejet i lumtur dhe, me anë të këtij postimi ju komunikoj edhe rikthimin tim në pistë.
Falënderime e mirënjohje për ata që besuan tek unë që në fillim, për punën e përkryer të avokatëve mbrojtës Ermir Beta dhe Romina Zano, përkthyeses zyrtare Etleva Pushi, si dhe familjes sime që duroi e përjetoi një stres të panevojshëm”, – shkruan Smajlaj në një postim në rrjetet sociale.
