Nga Boldnews.al
Në një kohë rekord, banorët e lagjes Ali Demi në Tiranë, kanë parë në rrugicat e banesave mjete të një firme private që ishte bërë gati të hidhte asfalt. Pa asnjë studim të mëparshëm, apo heqje bordurash, mjetet e rënda filluan të shfaqen në zonë. “Dje i vendosën tabelat e punimeve, sot erdhën mjetet. E çuditshme pasi në tabela thuhet se asfalti do të hidhet për 1 muaj. Kohë fushate. Më mirë të na e lënë kështu rrugën, është asfalt i hedhur nga një firmë italiane në vitet 1994. E kanë arnuar, por s’është prishur. Siç po e hedhin, ashtu do prishet”, thotë një banor i zonës për BoldNews.al.
Jo larg këtij banori, në hyrje të rrugës, BoldNews.al konstatoi se ishte vendosur një tabelë; Bashkia e Tiranës, emërtimi i objektit “sistemim, asfaltim i rrugës ‘Shemsie Haka’ dhe ‘Emin Harizaj’”.
Në të njëjtën tabelë shkruhet se projektuesi i kësaj rruge është Bashkia e Tiranës, ndërkohë që sipërmarrësi i punimeve firma “Geci”.
Por, shikoni pak afatin e përfundimit të punimeve. Në tabelë shkruhet se afati është vetëm “1 muaj”. Pra, duhet të përfundojë para zgjedhjeve. Vlera e këtij objekti pra vlera e punimeve është 198 milionë lekë të vjetra.
Pa kaluar shumë kohë, në të njëjtën rrugë ku ishte vendosur tabela, kanë “mbirë” mjetet e para të rënda të firmës fituese të këtij tenderi. Siç e shikoni nga ato foto, mjetet janë të firmës “Geci”, e cila ka marrë përsipër që të shtrojë asfaltin për disa ditë, para zgjedhjeve lokale. Mjetet erdhën me shpejtësi, pasi banorët as nuk ishin lajmëruan që të hiqnin të paktën mjetet e parkuara buzë asaj rruge.
Ndërkohë, në një rrugicë ngjitur me tabelën e parë, është parashikuar të bëhet një tjetër investim. Tabelat e vendosura janë të njëjta, ndërsa ndryshon vetëm vlera dhe objekti. Kësaj here shkruhet “sistemim i rrugës ‘Dhimitër Kamarda’, sipërmarrës i punimeve është firma ‘Geci’”. Pra, e njëjta firmë me rrugicën e parë. Edhe në këtë rast, afati i ndërtimit të objektit është vetëm 1 muaj kalendarik, ndërkohë që fondi për sistemimin e kësaj rruge është 173 milionë lekë të vjetra.
