Një ngjarje e rëndë është regjistruar në Shkodër mesditën e sotme, teksa një person u vra brenda banesës me breshëri automatiku nga qeraxhiu i tij.
Mësohet se në ngjarjen e ndodhur pranë varrezave katolike të qytetit, ka mbetur i vdekur shtetasi Petrit Vuksani.
Autori, i identifikuar si Lekë Vuksani ka hyrë brenda banesës ku 51-vjeçari jetonte dhe e ka qëlluar disa herë me armë zjarri, duke i marrë jetën.
Viktima ka qenë i vetëm në shtëpi kur është qëlluar nga autori, i cili dyshohet të jetë një i afërm i 51-vjeçarit dhe kishte marrë me qera banesën e këtij të fundit.
Po ashtu mësohet se viktima ka qenë emigrant në Itali dhe prej pak vitesh ishte zhvendosur në Britaninë e Madhe. Prej një muaji ai ishte kthyer në atdhe, një veprim rutinor ky i Vuksanit, i cili shpesh herë kthehej për të qëndruar në Shkodër ose në vendlindjen e tij, në Dukagjin.
Forca të shumta të policisë ndodhen në vendngjarje dhe ka nisur hetimet për të zbardhur rrethanat e ngjarjes. Uniformat blu kanë ngritur disa grupe kontrollesh për të bërë të mundur kapjen e autorit.
Njoftimi i policisë:
Shkodër/Informacion paraprak
Rreth orës 12:15, në lagjen “Tom Kola”, në rrethana ende të paqarta, në banesë, është vrarë me armë zjarri shtetasi P. V., 51 vjeç.
Shërbimet e Policisë dhe grupi hetimor kanë shkuar menjëherë në vendngjarje.
Janë ngritur pika kontrolli dhe po ushtrohet kontroll në zonë për kapjen e autorit të dyshuar.
Grupi hetimor, në drejtimin e Prokurorisë, po vijon punën për sqarimin e rrethanave të ngjarjes, si dhe për sigurimin e çdo prove, me qëllim identifikimin dhe kapjen e autorit.
