Një 39-vjeçar shqiptar që grabiste banesa në zonën e Borghese është vënë në pranga nga policia në Itali, pasi akuzohet për grabitjen e disa banesave.
Policia në Pistoia më 21 prill gjatë kontrolleve rutinore në autostradë hasi në një “Peugeot 208” të bardhë, mbi të cilën ishte shkruar “Shërbimet Postare”.
Pavarësisht normalitetit në dukje, hetuesve të policisë rrugore iu lindën dyshime për mjetin pasi “fonti” i shkrimeve dukej ndryshe nga ai i përdorur përgjithësisht nga mjetet postare italiane.
Për këtë arsye ata vendosën të ndiqnin automjetin në fshehtësi, duke mbërritur deri në Cantagrillo, ku makina ndaloi para një vile.
Pas disa minutash vëzhgimi, agjentët panë një burrë i cili me nxitim veshi rrobat tipike të postierit, xhaketën fluoreshente, dorezat dhe kapelën me mbishkrimin “shërbimi postar” dhe hyri brenda në makinë, me dëshirën e dukshme për t’ia mbathur sa më shpejt.
Në atë moment efektivët e policisë vendosën të ndërhyjnë, por shqiptari fillimisht tentoi t’i largohej, ndërsa më pas tentoi t’i godiste me shqelma dhe grushte, por pa ia arritur qëllimit për t’ia mbathur.
I bllokuar, ai u kontrollua dhe iu gjetën sendet me vlerë të sapo vjedhura nga vila.
Nga hetimet e mëvonshme u zbulua si i skeduar nga forcat e policisë dhe jetonte në mënyrë të paligjshme në territorin italian, teksa kërkohej prej gati dy vitesh dhe nuk ishte gjetur.
Edhe makina “Peugeot 208” përveç afisheve të parregullta, aplikacioneve ad hoc për të simuluar veprimtarinë e shërbimit postar dhe për të mos ngjallur dyshime te banorët, kishte dhe targa të vjedhura.
Në fund, 39-vjeçari shqiptar arrestua dhe u shoqërua në burgun e Pratos.
