Prej vetëm 8 ditësh në Britani, arrestohet 19-vjeçari shqiptar në një fermë kanabisi! I sekuestrohen mbi 28 mijë paund! I riu: Kam borxhe
Ëndrra britanike për një 19-vjeçar shqiptar është shuar në vetëm 8 ditë qëndrimi në ishull, pasi kishte mbërritur i fshehur në pjesën e pasme të një kamioni.
Mediat në Yorkshire raportojnë se i riu Mariglen Luka është arrestuar pasi u zbulua se kujdesej i vetëm për bimët në një banesë të përshtatur në fermë kanabisi, në qytetin e Leeds.
Policia mësyu në banesën në lagjen Ashville Grove më 6 mars të këtij viti, duke synuar të arrestonte një person tjetër, por brenda gjendën 19-vjeçarin.
Prokurori Mark Thomas tha se Marigleni u përpoq të ikte nga dera e pasme përpara se të ndryshonte mendje dhe të lejonte oficerët të hynin. Policia kontrolloi pronën dhe gjeti 52 bimë kanabisi në katin e dytë, prodhimi i të cilave mund të kapte një vlerë rruge prej 28,600 £.
Në dëshminë e tij, i riu shqiptar pranoi se jetonte në pronë dhe kujdesej për bimët. Mariglen Luka tregoi në sallën e gjyqit se kishte vetëm tetë ditë që kishte mbërritur në Britaninë e Madhe, duke bërë kalimin ilegalisht nga Belgjika.
Më tej ai tha se kishte një borxh prej 16,000 £ që duhej t’i paguante për rrugën hyrëse dhe rrëfeu se ishte dërguar direkt në pronë nga tregtarët e drogës kur mbërriti.
Ai tha se ishte i frikësuar nga ata të cilët e ndihmuan të hynte në Britani dhe u kishte borxh.
Megjithatë, u argumentua se Marigleni kishte një rol të rëndësishëm në “shtëpinë e barit” pasi ai “nuk i nënshtrohej presionit” dhe kishte çelësin e tij të shtëpisë, duke e lejuar atë të largohej në çdo kohë.
Për të gjitha këto arsye ai u dënua me 20 muaj burg, ndërkohë që do të përballet me Home Office pas kryerjes së dënimit.
