Vrasja e 20-vjeçarit Stivën Toshkëzi pranë gjimnazit “Partizani” në Tiranë ka marrë një rrjedhë të re që pas zbulimit se në konfliktin mes djemve për një vajzë, ka qenë i përfshirë edhe i biri 18-vjeçar i Admir Muratajt, i cili mbeti i vrarë në 2019 në grabitjen e Rinasit.
Raportohet se Arbër Murataj është shpallur në kërkim nga policia dhe uniformat blu kanë kryer kontroll në banesën e familjes së tij, por nuk e kanë gjetur aty.
Ndërkohë, kontrolle janë ushtruar edhe në disa banesa të të afërmve të tij, ku njërit prej tyre u është gjetur një sasi lënde narkotike, kanabisi dhe është shoqëruar.
Të njëjtat burime thanë se 18-vjeçari Arbër Murataj është shpallur në kërkim policor pasi dyshohet se Aksel Hoxha (Axel) është nxitur nga Murataj për të ngacmuar dashurën e Stiven Toshkëzit.
Kjo është konstatuar edhe nga vetë vajza, e cila ka deklaruar në polici se shqetësohej here pas here nga Murataj, gjë e cila ishte vënë re dhe nga Toshkëzi.
Ndërkohë, sa i përket sherrit dhe përplasjes fizike mes të rinjve, ajo ka ndodhur përpara 4 muajve në “Rrugën e Elbasanit”, ku Stiven Toshkëzi është plagosur me hanxhar nga Arbër Murataj, teksa 18-vjeçari shoqërohej nga Aksel Hoxha.
Toshkëzi ka arritur të mbrohet dhe të plagoset lehtë në bark dhe është larguar nga vendi i ngjarjes, por nuk ka bërë denoncim në polici pasi është kërcënuar me jetë nga Murataj. Pas këtij konflikti vajza po shqetësohej sërish në rrjetin social Instagram nga dy të rinjtë.
Sakaq, Hoxha nuk e ka pranuar që është ndikuar nga Murataj, por pretendon se ka pasur konflikte me viktimën që prej sherrit ku ishin përfshirë 3 të rinjtë.
Por, 20-vjeçari që mbeti i vdekur është telefonuar disa herë nga Murataj për t’u takuar, megjithëse nuk ishin dakordësuar për shkak se mes tyre kishte situata të tensionuara herë pas here.
