Myrto Uzuni është kthyer në një emër shumë të kërkuar në Spanjë. Sulmuesi shqiptar është golashënuesi më i mirë i La Liga 2 dhe nuk është aspak çudi që shumë skuadra të njohura edhe nga elita e kërkojnë.
Një prej tyre raportohet se është Sevilja, e cila sheh bomberin shqiptar si një futbollist i cili mund të ndihmojë në edicionin e ardhshëm që ekipi të kthehet si pretendent për zonat e sipërme në klasifikimin e La Liga. Skuadra ka kaluar në gjysmëfinalet e Ligës së Europës ku luan ndaj Juventusit, por duket se për momentin vëmendja është kthyer te përforcimet e sezonit të ardhshëm, me Uzunin që mendohet se do të jetë dhurata e madhe e drejtorit sportiv Monçi.
Megjithatë, për transferimin e sulmuesit shqiptar, Sevilja shpreson që Granada të mos ngjitet vetë në elitë. Kjo pasi në klauzolën e kontratës së tij është vendosur që shifra e largimit shkon në 25 milionë euro nëse e lë ekipin në La Liga.
Shpenzim që Sevilja nuk është gati ta bëjë, ndonëse futbollisti raportohet nga mediat spanjolle se është i tërhequr nga ideja për të luajtur me klubin i cili mban numrin rekord të 6 trofeve të fituar në Ligën e Europës.
