Me biletën për në gjysmëfinalet e Ligës së Kampioneve të siguruar në mesjavë, Reali i kthehet sonte kampionatit spanjoll në përballjen kundër Selta Vigos. Trajneri Ançeloti ka dalë në një konferencën për shtyp, ku është ndalur te kampionati, por një pjesë e madhe e konferencës ka qenë e fokusuar te Champions-i dhe përballja e ardhshme kundër Sitit të Guardiolës.
Italiani i Realit ka lënë të kuptohet nuk ka hequr ende dorë nga La Liga, ndërsa për Champions-in ai ka nënvizuar se Guardiola dhe Siti kanë ndryshuar disi stilin e tyre të zakonshëm me ardhjen e Halandit.
SELTA – “Gëzojnë të gjithë respektin tonë. Janë një skuadër e organizuar mirë dhe me individualitete të spikatura. I respektojmë, por duam të fitojmë”.
GUARDIOLA I RI – “Nga ajo çfarë kam parë dhe analizuar, është e vërtetë se ka ndryshuar disi. Por Siti vijon të mbetet një skuadër shumë e fortë me një sulmues që shënon shumë (Haland). Nëse duam të shkojmë në finale, duhet të bëjmë më mirë se ata”.
SITI, FAVORIT – “Kjo nuk është një temë në mendjen time. Ne e kemi të qartë se ndodhemi 180 minuta larg finales dhe se kjo do të jetë një përballje mes të barabartësh. Të shohim kush do të kalojë”.
LA LIGA – “Po, kjo është një javë e rëndësishme. Ne duhet të luftojmë deri në ndeshjen e fundit, deri kur matematika të na mbajë në garë për titullin. Skuadra gëzon një formë mjaft të mirë. Ajo që më shqetëson është vetëm kalendari shumë i ngjeshur. Na duhet të kujdesemi edhe për shëndetin e lojtarëve. Për fat të keq secili mendon për interesin e tij, La Liga për të vetin, federata për të vetin, UEFA për të sajin, FIFA gjithashtu. Po për lojtarët kush mendon? Diçka duhet të ndryshojë me doemos”.
ELOZHET NGA PEP – “Reali është një klub i respektuar dhe kjo është diçka pozitive. Nëse një gjë e tillë del nga goja e një trajneri si Pep, më mirë akoma”. BENZEMA – “Është mirë! Kishte një problem ndaj Çelsit dhe mendova ta zëvendësoj, pasi ndeshja ishte thuajse e mbyllur. Kam menduar që ai sikurse Modriç e Kros të kenë disa minuta më shumë pushim. Mërzitja e tij? Jemi sqaruar, nuk ka pasur asnjë hatërmbetje”.
SITI E REALI – “Reali dhe Mançester Siti janë dy skuadra me shumë resurse, ndaj mund të luajnë me disa variante. Ndoshta me Halandin ata kanë ndryshuar disi, por mund të luajnë dhe bazuar në zotërimin e topit, sepse i kanë të gjitha cilësitë në përbërje”.
RODRIGO – “Në Champions po rezulton shumë vendimtar me golat e tij. Në La Liga po luan shumë për ekipin. Unë jam i kënaqur, pasi po përfitojmë prej tij”.
