Ramazan Rraja, i arrestuar mbrëmjen e së mërkurës në një lokal pranë “Urës së Gjolës” në Fushë-Krujë, pasi mbi të rëndonte një urdhër ndalimi i shpallur nga SPAK më 17 janar, është lënë në burg me një vendim të marrë sot nga Gjykata e Posaçme.
Nipi i deputetit socialist Rahman Rraja akuzohet për atentatin ndaj ish-prokurorit Ajran Ndoj dhe mikut të tij Aleksandër Laho, i njohur si “Rrumi i Sukthit”, ku mbeti i vrarë shoferi i tyre Andi Maloku. GJJKO ka caktuar kështu vazhdimin e masës “arrest me burg” të dhënë në mungesë
Ndërkohë përveç akuzave në lidhje me atentatin e ndodhur te mbikalimi i Shkozetit, në hyrje të Durrësit, ndaj Rrajës është ngritur edhe akuza e armëmbajtjes pa leje.
“Xon Rraja” u arrestua teksa ndodhej për iftar në lokal së bashku me Luis Konomin, e njohur si “Çupja” i Elbasanit.
Një “pakujdesi” nga ana e Rrajës, i cili sipas policisë fshihej prej muajsh në trekëndëshin Durrës-Lezhë-Tiranë, ka bërë kështu që një nga emrat më të kërkuar nga SPAK, të përfundojë pas hekurave.
Në dëshminë e tij pak pas arrestimit, Ramazan Rraja u tregua i rezervuar përpara hetuesve për armën që iu gjet në brez, një pistoletë me fishek në fole gati për qitje.
Nipi i deputetit socialist ka thënë se kjo armë nuk ishte e tija, por nuk ka pranuar të flasë më shumë mbi personin që e dispononte apo që ja ka siguruar atë.
Rraja sipas policisë duke qenë se ishte në kërkim kryente lëvizje të mirë kontrolluara, duke ju shpëtuar postoblloqeve dhe kontrolleve rutinë.
Ndërkohë mësohet se pas arrestimit të tij po verifikohen ambientet ku qëndronte nipi i deputetit të Krujës.
DËNIMI NË BELGJIKË
Rraja në seancë ka mbajtur qëndrim mohues në lidhje me ngjarjen, duke pretenduar se nuk ka asnjë lidhje me atentatin ndaj ish-prokurorit.
Ndërkohë, drejtësia belge më 28 shkurt vendosi të dënojë në mungesë me 12 vite heqje lirie, Ramazan Rrajan.
Vendimi u mor nga një Gjykatë në Antwerp, ku Rraja u dënua pasi akuzohet si pjesë e një organizate kriminale, e cila sipas mediave atje ka trafikuar sasi të mëdha kokaine nga Ekuadori në drejtim të Belgjikës.
Hetuesit arritën të binin në gjurmët e grupit kriminal falë pajisjeve të përgjimit që kishin vendosur në banesën e kreut të grupit në Berchem.
Në një prej përgjime Ramazan Rraja dëgjohet duke komunikuar me Kaspars N., ku së bashku flasin për një kontejner që ndodhej në kalatën 1742 të portit.
Ky kontejner me banane ishte kontrolluar nga dogana, por në të nuk ishte zbuluar lëndë narkotike. Por në një kontrolli të ri, doganierët gjetën të fshehur në tavanin e kontejnerit një ngarkesë prej 57 kilogramë kokainë.
Gjithashtu kapja e 50 kilogramëve kokainë në Vlissingen të Holandës dhe një tjetër ngarkese me 80 kilogramë në Civitavecchia pranë Romës, ishin të lidhura me grupin e Rrajës.
Telefonat celularë të anëtarëve të bandës siguruan material fotografik të shumtë për hetuesit. Shtretër hotelesh plot me para, foto jahtesh luksoze dhe orë me vlerë 655 mijë euro. Ata panë gjithashtu shumë foto të pakove të kokainës.
Udhëheqësi Kaspars N. Dhe dy “togerët” e tij, ku bën pjesë edhe Rraja u dënuan me 12 vite burg dhe 48 mijë euro gjobë. Anëtarët e tjerë të organizatës morën dënime nga katër deri në shtatë vjet burg.
LEXO EDHE:
“Xon Rraja dhe “Çupja” u kapën gjatë iftarit, çfarë deklaroi për pistoletën nipi i deputetit të PS
‘Me këmishë gjysmë të hapur’, publikohet FOTO e Ramazan Rrajës gjatë arrestimit
Dënimi me 12 vite burg/ Si u përgjua Ramazan Rraja nga belgët në “pazaret” e kokainës
