Braktisja masive nga kandidatët e përzgjedhur prej tij për garën për kryebashkiakë në zgjedhjet lokale të 14 Majit por edhe nga emrat që kandidojnë për këshillat bashkiakë, e ka shoqëruar Enkelejd Alibeajn edhe në çeljen e fushatës elektorale që ai dhe grupi i PD-së së vulës kanë bërë sot në Tiranë.
Grupi “Alibeaj” e nisi fushatën zgjedhore 4 ditë pas rivalëve të tjerë, teksa në pallatin e sportit “Fahri Hoti” në kryeqytet, kryetari i komanduar i PD i prezantoi elektoratit të tij prej disa qindra personash, kandidatin për kryebashkiak në Tiranë, Roland Bejko.
Nën sloganin “Frymëmarrje për Shqipërinë”, fjalën nga podiumi përveç Alibeajt dhe Bejkos e morën edhe 7 përfaqësues të tjerë të këtij grupi, por ajo çka rrëmbeu vëmendjen ishte katandisja e atij që pretendohej të ishte një grup parlamentar, me rreth 20 deputetë.
Të pranishëm në takimin hapës të fushatës ishin vetëm deputetët demokratë që kanë mbështetur kandidimin e Bejkos, si Oriola Pampuri, Kreshnik Çollaku, Lefter Gështenja, Andia Ulliri e po ashtu sekretari i Përgjithshëm i PD-së së vulës, Gazment Bardhi.
Në organizim kanë munguar deputetë që kanë qenë zërat kryesorë të grupit Alibeaj në Parlament që prej krisjes në Partinë Demokratike, si Jorida Tabaku, Dashnor Sula, Saimir Korreshi apo Dhurata Çupi.
Shumë prej këtyre deputetëve janë angazhuar në fushatën zgjedhore të koalicionit “Bashkë Fitojmë” duke mbështetur hapur kandidatët e dalë nga Primaret e organizuara në PD, duke nënvizuar se nuk ndihen të përfaqësuar në vendimet që merr grupi “Alibeaj”.
Ndërkohë, në fjalën e tij para të pranishmëve Alibeaj zgjodhi të sulmonte liderin e opozitës Sali Berisha, duke mos thënë asnjë fjalë për korrupsionin e qeverisë Rama, shpopullimin e vendit apo zhytjen në varfëri të shqiptarëve.
Sakaq, Roland Bejko vazhdoi “valsin” e Alibeajt duke mos përmendur kullat e Erion Veliajt dhe miliona metër katrorë leje ndërtimi të dhëna në dy mandate, trafikun stresues apo vjedhjen me tenderat milionësh në kryeqytet dhe largimin e të rinjve, por duke sulmuar ish-kryeministrin Berisha.
“Kur pranova të kandidojë pranova sepse unë nuk jam kursyer në asnjë moment, jam një prej demokratëve të thjeshtë që kanë luftuar për Partinë Demokratike dhe nuk kanë përfituar kurrë prej saj. Së dyti, si mund të lejonim ne që Tirana të udhëhiqej nga një “non grata”, i shpallur si i tillë nga Amerika për korrupsiopn, si mund të lejonim ne që demokratët të binin në dorën e Ilir Metës”, tha Bejko.
