Një përplasje në distancë ka lindur së fundmi midis ministrit të Drejtësisë Ulsi Manja dhe kandidatit demokrat të koalicionit “Bashkë Fitojmë” për zgjedhjet lokale të 14 majit në Kubrin.
Ishte Manja që si drejtues politik i qarkut të Lezhës për PS ndezi përplasjen, teksa në një takim elektoral në Kurbin i ka treguar banorëve se nuk duhet të votojnë për Behar Haxhiun dhe koalicion Berisha-Meta.
Përgjigjia për Manjën, të cilin Rama e largoi nga qarku i Dibrës pas katrahurës elektorale në këtë qark u shërbye e freskët nga vetë Haxhiu, i cili me një postim në rrjetet sociale i drejtohet me një thirrje ministrit.
Ai nënvizon se Manja duhet të shkojë dhe t’u japë llogari qytetarëve të Bulqizës se pse iu prezantoi Lefter Allën si kryebashkiak në zgjedhjet moniste të 2019 dhe më pas t’u tregojë kurbinasve kë duhet të votojnë.
“Ulsi, mos u jep mend kurbinasve, po kërkoju falje bulqizakëve për Lefter Allën! Personazhi komik i “Dosjes 184” Ulsi Manja në vend që të shkojë në Bulqizë dhe t’u kërkojë falje atyre qytetarëve të nderuar që u kërkoi votën për Lefter Allën, paska ardhur në Kurbin për t’ju dhënë mend banorëve të kësaj treve se kë të votojnë në 14 maj”, është thirrja e Behar Haxhiut.
Më tej me ironi, kandidati i opozitës për bashkinë Kurbin i kujton Manjës se falë “vizionit” të tij, vetëm në Peshkopi në 8 vite janë ndërruar 4 Kryetarë Bashkie, duke mos mbyllur asnjëri mandatin e tij.
“Një kryebashkiak në detyrë i Peshkopisë dhe një kryebashkiak në detyrë i Bulqizës kanë përfunduar në pranga dhe për këto “arritje”, Partia Socialiste e gradoi shokun Manja duke e sjellë të deleguar politik në një qark të rëndësishëm si Lezha”, thekson Haxhiu.
Më tej, Haxhiu shprehet se ndryshimi i shumëpritur në 14 maj dhe dëshira për një të ardhme më të mirë e bën bashkë me qytetarët e Kurbinit në këtë rrugëtim të ri, ndaj as presioni as fasada që ofron qeveria dhe Manja nuk do ta ndalin.
“Ulsi, ta harroni se mundeni që me presione e fasadë do ta tjetërsoni vullnetin e qytetarëve të kësaj treve, që në 14 maj do t’i bashkohen ndryshimit të madh që do t’i rikthejë Kurbinit identitetin dhe dinjitetin”, shprehet ai.
