Nuk ka zgjatur as një vit aventutra e një 22-vjeçari shqiptar në Britaninë e Madhe, pasi u arrestua në një fermë kanabisi në qytetin e Leeds, pak kohë pasi kishte mbërritur me kamion në ishull në verën e vitit 2022.
Dorjan Mera u arrestua nga policia teksa ishte duke u kujdesur për 126 bimë kanabisi në një shtëpi në Buckton Vieës të Leeds, më 9 shkurt. Oficerët hynë befasisht dhe e gjetën 22-vjeçarin duke fjetur në një shtrat në kuzhinë, ndërsa zbuluan se pjesa tjetër e shtëpisë ishte mbushur me kanabis.
Prokurori Bashir Ahmed tha në seancën e mbajtur në Gjykatën e Kurorës së Leeds se “shtëpia e barit” kishte një rendiment të mundshëm prej 7 kg kanabis, me një vlerë rruge prej 70,000 £.
Ndërkohë, Mera ia ndërlikoi punët vetes pasi gënjeu në seancën e parë, duke pretenduar në mënyrë të rreme se ai ishte trafikuar në Mbretërinë e Bashkuar dhe ishte detyruar të punonte aty nën kërcënimin se familja e tij do të vritej.
Home Office hodhi poshtë pretendimin e të riut se banda që e trafikoi në Britani do të vriste nënën apo motrën e tij, në rast se 22-vjeçari nuk punonte në fermën e kanabisit.
Më vonë u pranua se atij iu bë “presion” për të punuar në fermë për të shlyer borxhin që u kishte trafikantëve për transportin e tij, por nuk u detyrua të udhëtonte në MB.
Ai kishte mbërritur me një kamion verën e kaluar, tha avokati i tij Benjamin Campbell. Ai shtoi: “Atij i vjen keq për këtë seri ngjarjesh dhe nuk dëshiron asgjë më shumë se të shkojë në shtëpi te familja e tij në Shqipëri dhe të punojë atje. Ai u vu nën presion për t’u kujdesur për kanabisin për të shlyer tarifën prej 25,000 £.”
22-vjeçari më pas u burgos për 18 muaj dhe pasi të kryejë dënimin pritet të ekstradohet në Shqipëri.
