Kandidati i koalicionit “Bashkë Fitojmë” për Bashkinë e Durrësit, Igli Cara është takuar me qytetarët në zonat e dëmtuara nga tërmeti në Durrës.
Gjatë këtij bashkëbisedimi, Igli Cara tha se qytetarët prej gati dy muajsh nuk marrin bonusin e qirasë nga Bashkia e Durrësit, duke shtuar se ata janë të gatshëm të heqin dorë nga ky bonus vetëm që të rikthehen sa më shpejt në banesat.
“Të gatshëm për të hequr dorë nga bonusi i qirasë që nuk marrin prej dy muajsh nga Bashkia e Durrësit, vetëm që të rikthehen sa më shpejt në banesat e tyre. Në pritje që të bëhen lidhjet për energjinë elektrike dhe furnizimin me ujë, këto familje në lagjen numër 12 të qytetit mbeten peng i Bashkisë së Durrësit. Kërkesat e përsëritura të këtyre banorëve, drejtuar institucioneve përkatëse prej kohësh bien në vesh të shurdhët. Në 14 maj bëhemi bashkë! Për familjen, për Durrësin! Qyteti je ti”, shkruan Cara në një postim në rrjetet sociale, ku përcjell dhe pamjet nga takimi me banorët.
