Ernejt Shyti, i cili ekzekutoi Behar Sofinë në 25 shkurt të vitit 2021 në bulevardin “Zhan D’Ark” ka dhënë sot dëshminë e tij të radhës në Gjykatën e Posaçme (GJKKO), duke “zbërthyer” të gjithë ngjarjen që nga marrja e porosisë për vrasjen e bujshme.
Para togave të zeza, ai ka zbuluar dy emra të tjerë të përfshirë në historinë e vrasjes, duke identifikuar si “Dajo” shtetasin Skënder Vathi, ndërsa “Djali i ri” tha se thirrej Leonard Xhixha.
Për Vathin tha se është takuar para ngjarjes te terminali ndërqytetas i autobusëve pranë Qytetit Studenti, ndërsa ditën e ngjarjes nuk i kishte dalë në takim pranë liqenit Artificial.
Shyti foli edhe për dy vrasje të tjera që kishte përgatitur grupi, atë të një 34-vjeçari në Kamëz dhe të një tjetër shtetasi në Gjermani për të cilën do të paguhej 500 mijë euro.
Sipas tij, porosinë për vrasjen e një personi në Gjermani ia dha i bashkëpandehuri tjetër Xhuliano Visha.
“Për asnjërin nuk kisha as emër as fotografi. Xhuljano Vishaj më kishte porositur, por pa më dhënë detaje. Për vrasjen në Kamëz më kishte thënë që do e kryente vetë, ndërsa atë në Gjermani do e kryeja unë përkundrejt 500 mijë eurove”, tha ai.
Ndërsa për vrasjen e Behar Sofisë, Shyti ka treguar se e ka mbajtur disa ditë në vëzhgim dhe vrasjen e ka marrë përsipër në këmbim të 50 milionë lekëve, por paratë edhe pse kreu ekzekutimin, nuk i mori.
sipas tij, 28 ditë i ka zgjatur vëzhgimi i Behar Sofisë, e madje Shyti tregon edhe një episod konkret.
“Disa ditë para ngjarjes, e kam ndjekur Behar Sofinë nga Piramida deri tek ish-ekspozita. E identifikova por nuk e kreva dot vrasjen. Atentatin ndaj Behar Sofisë e bëra për 50 milion lekë, paratë nuk i mora asnjëherë, pavarësisht se Xhuljano Visha më kishte thënë se do t’i merrja 3 ditë pas ngjarjes. Bujar Lezën e kam takuar për biçikletën, me Xhuljano Vishën, më pas më ka pyetur edhe nëse do i ndërroja rrobat kur të kryeja ekzekutimin. Mësova se Bujari i kishte thënë Xhulios se edhe armën e kishte gjetur. Vrasjen më tha Visha do e bënte për hasmëri, por se për çfarë dhe nga kush ishte porositur nuk e di. Ditën e krimit, nuk mu shkrep arma, e mbusha dhe pastaj qëllova dy herë. Skënder Vathi do më merrte te Liqeni Artificial, por nuk erdhi. Kam ikur drejt Malit të Zi me vëllain dhe Xhuljano Vishën, nuk kemi ndaluar askund as për të ngrënë. Për komunikim me anëtarët e grupit, kisha një telefon të markës “Iphone” që ma dha Xhuljano Visha të cilit ia ktheva dhe një “Nokia” që ma dha Leonard Xhixha. Ky i fundit, kur kam kryer vrasjen, ka qenë duke vëzhguar shenjestrën, kur kaloi te trotuari, më ka thënë se jam këtu afër dhe se po shkonte te lokali”, u shpreh Shytaj.
Gjatë seancës, pati një ndërhyrje nga Bujar Leza, i cili tha se dikush e ka mësuar bashkëpunëtorin e drejtësisë t’a përmendi biçikletën dhe që sipas tij, Ernejt Shyti po e pranonte se nuk kishte njohje me Lezën.
Ndërkohë, gjykata thirri të paraqiten në seancën e ardhshme 3 dëshmitarë. Po gjatë kësaj seance që do mbahet më datë 20 prill në orën 14:00, do të jenë të pandehurit që do të japin deklarimet e tyre. Ata janë Skënder Vathi, Xhuljano Visha, Leonard Xhixha dhe Bujar Leza.
