Njësia administrative Nr.11 në Tiranë që shtrihet në zonën e Laprakës është nga më pak të investuarat prej Bashkisë së Tiranës, ndërkohë që banorët jetojnë me frikën e shembjes së banesave të tyre, pasi preken nga gjurma e “Unazës së Madhe” dhe hekurudhës Tiranë-Rinas-Durrës.
Në këtë zonë, vitet e fundit, për shkak të ndërtimit të Unazës së Re, por edhe të projekteve të rindërtimit, shumë banorë kanë humbur pronën e tyre, ndërsa nga bashkia e Tiranës drejtuar nga Erion Veliaj, nuk janë dëmshpërblyer.
Këta banorë gjithashtu kanë protestuar vazhdimisht kundër prishjes së banesave të tyre dhe asnjëherë nuk kanë marrë një përgjigje konkrete se si do të shpronësohen dhe kompensohen nga Bashkia e Tiranës.
Një takim me ta në kuadër të fushatës elektorale për zgjedhjet lokale të 14 majit është zhvilluar nga kandidati i koalicionit opozitar “Bashkë Fitojmë” për bashkinë e Tiranës, Belind Këlliçi.
Gjatë takimit ai e vendosi theksin te ky problem që prek shumë familje në këtë njësi, duke nënvizuar se do të angazhohet që pas 14 majit të bëhet dëmshpërblim i plotë i banorëve dhe me çmimin e tregut.
“Çdo shtëpi që është prishur në Njësinë Nr.11 nga projektet e infrastrukturës, të rindërtimit, do të dëmshpërblehet një për një në mënyrë të drejtë me metra katror, dhe me çmimin e tregut. Shtëpitë afër shinave, që do të prishen për zgjerimin e hekurudhës, ku janë vendosur dhe një pjesë e madhe e komunitetit rom, do të dëmshpërblehen një për një dhe do të jenë plotësisht në vëmendjen e bashkisë”- u shpreh Këlliçi.
Në këtë kontekst, duke folur për projektvendimin e qeverisë për auditimin e pallateve 50-vjeçare, Belind Këlliçi u shpreh se asnjë pallat në këtë moshë nuk do të shembet. Madje, ai siguroi se pas 14 majit këto pallate të rikonstruktohen me sistem kapot, e cila minimizon kërkesat për energji të familjeve që banojnë në to.
“Në lidhje me godinat 50-vjeçare. Asnjë pallat i vjetër nuk do të prishet, madje do të ndërhyjmë për të bërë të mundur veshjen e pallateve me kapot, për të kursyer energjinë. Ky është një premtim që e jap para jush, nuk do t`i preket prona asnjë qytetari, asnjë familje”- tha kandidati i opozitës për Bashkinë e Tiranës.
Problemet e infrastrukturës në Laprakë janë shqetësim parësor për banorët. Belind Këlliçi u angazhua që në këtë zonë, pasi ai të marrë drejtimin e bashkisë Tiranë, të kryhen investime në rikualifikimin urban dhe infrastrukturën e lagjeve.
“Sistemimi i bllokut, me shtëpi private afër fabrikës së tullave. Rrugë të paasfaltuara që ju i shihni çdo ditë, rrugët janë pa trotuare dhe pa ndriçim, ne në këtë zonë do të bëjmë një ndërhyrje të plotë. Do të rregullojmë infrastrukturën rrugore në Kodër Kamëz edhe te Treshi. Do të marrë fund historia, që nënat e reja, nuk kanë trotuar që të nxjerrin fëmijët me karrocë. Padiskutim do të ndërhyjmë në kanalizim për të shmangur përmbytje në zonën e “Zogut të Zi” në zonën e “Dërrasave”, u shpreh Belind Këlliçi.
Një tjetër premtim është ai për ndërtimin e kopshteve, shkollave dhe çerdheve, të cilat edhe në Njësinë Nr.11 nuk janë të mjaftueshme.
“Zona e Bregut të Lumit ka vetëm një çerdhe të vogël dhe një kopsht pa drekë. Historia e zonave, e njësive, që nuk kanë kopshte, shkolla dhe çerdhe do të marrë fund. Unë jam ndalur në planin tim për arsimin, në propozimin që kam bërë për taksën e 3% që do të dedikohet për kopshte e çerdhe dhe nëse nuk mjafton, i gjithë 8% i taksës së infrastrukturës që vjen nga lejet e ndërtimit, do të shkojë për çerdhe, kopshte dhe shkolla”, u shpreh kandidati opozitës para banorëve të Laprakës.
