Konfliktet mes të rinjve që degjenerojnë deri në përdorimin e thikës apo armëve të tjera të ftohta janë bërë masive kohët e fundit, teksa plagosje mes adoleshentëve janë regjistruar në Durrës, Shkodër, Korçë e Tiranë.
Rasti më i fundit i një sherri banal mes të rinjsh ku është përdorur edhe thika, është shënuar në Pogradec.
Mësohet se ngjarja ka ndodhur në fshatin Çërravë, ku një 19-vjeçar ka sulmuar me thikë bashkëmoshatarin e tij pas një konflikti të çastit.
Ende janë të paqarta rrethanat e ngjarjes, por policia bën me dije se 18-vjeçari i plagosur është transportuar në spital për ndihmë të specializuar mjekësore.
Njoftimi i policisë:
Dëmtoi me thikë, një 18-vjeçar, gjatë një konflikti të çastit, falë reagimit në kohë të Policisë, kapet dhe vihet në pranga 19-vjeçari, autori i dyshuar.
Më datë 12.04.2023, në fshatin Çërravë, Pogradec, shtetasi M. B., 19 vjeç, banues në fshatin Çërravë, gjatë një konflikti, dyshohet se ka dëmtuar me mjet prerës (thikë), një 18-vjeçar, i cili u transportua në spital për ndihmë mjekësore.
Falë ndërhyrjes të shpejtë, shërbimet e Policisë bënë të mundur kapjen dhe arrestimin në flagrancë të autorit të dyshuar të plagosjes, shtetasit M. B., për veprën penale “Plagosja e rëndë me dashje”.
Grupi hetimor po punon për sqarimin e plotë të rrethanave të ngjarjes.
Materialet do t’i referohen Prokurorisë pranë Gjykatës së Shkallës së Parë Pogradec, për veprime të mëtejshme.
