Për atentatin me tritol në Vaun e Dejës, ku u hodh në erë makina e kreut të degës së PD, para oborrit të banesës së tij, ka folur për mediat edhe babai i , Benard Ndreca.
Teksa i biri shpëtoi mrekullisht pas shpërthimit me tritol në momentin që u nis për në punë me makinën tip “Audi”, i ati i tij ka thënë për mediat se nuk dyshojnë tek asnjeri, por theksoi se nuk kanë frikë nga askush.
I ati i Ndrecës nënvizon se familja e tyre nuk ka konflikte me asnjë person.
“Nuk ka pasur konflikte me asnjë. Nuk e di pse ka ndodhur një gjë e tillë. Nuk kemi frikë. Janë gjëra që ndodhin. Policia nuk na tha asgjë. Nuk dyshojmë te asnjeri. S’kemi fol më asgjë me djalin”, tha ai.
Ndërkohë nga të afërmit që janë mbledhur në shtëpinë e Ndrecës, për mediat ka folur vetëm tezja e tij, e cila nuk e ka fshehur aspak gëzimin që nipi shpëtoi mrekullisht nga atentati.
“Na ka shpëtuar djali është gjë e madhe. Unë jam tezja. Nuk ka pasur probleme me asnjë. Ka qenë i qetë. Nuk ka shok si veten”, thotë tezja e kreut të PD në Vaun e Dejës.
Edhe fqinjët e kreut të PD në Vaun e Dejës kanë folur për mediat lidhur me shpërthimin. Ata njëjtë si i ati i Benard Ndrecës shprehen se ai nuk ka konflikte me njeri dhe se shpërthimi mund të ketë lidhje me angazhimin në politikë.
“Ky s’ka pas konflikte më askënd, ka punuar në punën e vetë. Ndoshta janë bindjet politike që mund të ketë ndodhur kjo punë”, u shpreh një nga fqinjët.
Ata gjithashtu deklarojnë se ndihen të frikësuar si pasojë e asaj që ndodhi, pasi në të ardhmen mund të ketë edhe ngjarje më të rënda.
“Ishte nusja këtu jashtë kur ka ndodhur shpërthimi dhe pa që doli tym nga makina. Në kujtuam se ishte tërmet, por e kuptuam kur dolëm jashtë. Normal jemi frikësuar, jashtë ishte gruaja dhe fëmijët që po shkonin në shkollë. U trembën por fëmijët ikën në shkollë. Të jesh në punën tënde dhe në shtëpinë tënde dhe normal kur ndodhin ngjarje të tilla ke frikë. Se sot ndodhi kjo dhe nesër mund të ndodhë diçka më e madhe”, tha fqinji.
