Tre ditë para nisjes zyrtare të fushatës elektorale për zgjedhjet vendore të 14 Majit, një atentat me tritol që ka për shënjestër kreun e degës lokale të Partisë Demokratike, është regjistruar në Vaun e Dejës.
Në orët e para të mëngjesit, mjeti tip “Audi” i Benard Ndrecës ka shpërthyer teksa ishte parkuar përpara shtëpisë së tij në fshatin Paçram.
Policia e Shkodrës në detajet që ka publikuar lidhur me ngjarjen e rëndë, saktëson se shpërthimi ka ndodhur në momentin që Ndreca ka hipur në automjet, por fatmirësisht ai ka shpëtuar pa lëndime.
Ndërkohë ngjarja ka terrorizuar banorët e zonës, pasi shpërthimi ka qenë tepër i fuqishëm.
NJOFTIMI I POLICISË
Rreth orës 07:10, në fshatin Paçram, Vau i Dejës, në pjesën e përparme të automjetit tip “Audi”, në pronësi të shtetasit B. N., dyshohet se ka shpërthyer lëndë plasëse.
Me marrjen e njoftimit, menjëherë në vendngjarje kanë shkuar shërbimet e Policisë dhe grupi hetimor.
Nga veprimet e para rezulton se shpërthimi ka ndodhur në momentin që shtetasi B. N. ka hipur në automjet.
Nga shpërthimi, shtetasi B. N. nuk ka pësuar dëmtime, por janë shkaktuar vetëm dëme të pjesshme materiale.
Grupi hetimor, në drejtimin e Prokurorisë, vijon veprimet intensive në vendngjarje, me qëllim zbardhjen e rrethanave të ngjarjes, identifikimin dhe kapjen e autorit/ve.
