Një prej restoranteve të preferuar të presidentit francez Emmanuel Macron në Paris, i është vënë flaka nga protestuesit të enjten gjatë përleshjeve me policinë dhe trazirave në bregun e majtë të lumit Sena.
Stafi në “La Rotonde” në zonën Montparnasse të qytetit u detyrua të shuante flakët në tendën e restorantit ku Macron mbajti një festë fitoreje kur triumfoi në zgjedhjet e 2017-ës.
Një gazetar i AFP pa një grup burrash të veshur me të zeza që hidhnin gurë në drejtim të restorantit.
Zjarri u shkaktua nga një flakadan i ndezur që u hodhë në tendën prej pëlhure.
Kordonë policie u formuan për të mbrojtur restorantin në fjalë, në ditën e 11-të të protestave kombëtare dhe grevave kundër përpjekjes gjerësisht jopopullore të Macron për të rritur moshën e pensionit nga 62 në 64 vjeç.
Divanet me velur të kuq dhe ndriçimi i butë i “La Rotonde”, një strehë e Belle Epoque e frekuentuar dikur nga Picasso, kanë qenë prej kohësh të preferuarët e Macron dhe gruas së tij Brigitte.
Ish-bankieri i investimeve zhvilloi takime strategjike atje teksa përgatiste ofertën e tij për presidencën në 2017 dhe dihet se hante atje me gruan e tij që kur fitoi pushtetin.
Në një vendim të kritikuar si elitar nga kundërshtarët e tij në atë kohë, Macron përdori “La Rotonde” për të pritur stafin dhe aleatët politikë për të krijuar një parti, pasi ai kryesoi raundin e parë të votimeve në 2017.
Restoranti ka qenë në shënjestër edhe më parë për shkak të lidhjes së tij me presidentin 45-vjeçar.
Në vitin 2020, gjatë protestave të dhunshme antiqeveritare nga të ashtuquajturit “Jelekët e Verdhë”, një sulm i dyshuar me zjarrvënie la të dëmtuar hyrjen e tij.
“Kur ka marshime e kështu me radhë, dëgjon njerëzit që thonë “Vdekje Rotondës, Vdekje Macronit”, tha për AFP-në Gerard Tafanel, i cili zotëron restorantin së bashku me vëllain e tij Serge.
“Ndodh gjatë gjithë kohës: telefonata anonime, njerëz që hyjnë në mes të ditës duke thënë “Vdekje Macron”.
