Detaje të reja kanë dalë në dritë për ngjarjen e ndodhur pak pas mesnate në qytetin e Korçës, ku i është vënë flaka një automjeti tip “Mercedes Benz”, që ndodhej i parkuar.
Ngjarja ka ndodhur në vendin e quajtur “Ura e Fajancës”, në unazën e qytetit juglindor dhe policia ka arritur në përfundimin se automjetit i është vënë flaka qëllimisht.
“Më datë 06.04.2023, rreth orës 01:10, pranë vendit të quajtur “Ura e fajancës”, ka rënë zjarr në automjetin tip “Benz” në pronësi të shtetasit K. C., banues në Korçë, i cili ishte i parkuar. Grupi hetimor po punon për zbardhjen e rrethanave të ngjarjes dhe përcaktimin e shkaqeve të rënies së zjarrit”, njoftoi policia.
Ndërkohë, mësohet se pronari i mjetit është shtetasi Klodian Cacani, i cili nuk njihet si person me precedentë penalë.
Gjatë këqyrjes së kamerave të sigurisë shihet se një person i afrohet për t’i vënë flakën mjetit, duke i hedhur lëndë djegëse. Në një moment pakujdesie duket se autori ka marrë dëmtime edhe vetë gjatë vendosjes së zjarrit.
Deri më tani ai nuk është identifikuar, ndërsa policia pritet të hetojë edhe personat që janë paraqitur për ndihmë mjekësore në rast djegie në ndonjë prej spitaleve të juglindjes.
