Rreth tre kilogramë e gjysmë kokainë e groposur në një pyll në zonën e Uppiano, në kodrat mbi Città di Castello, kanë orientuar autoritetet italiane drejt arrestimit të një të riu shqiptar.
I riu shqiptar me iniciale F.K., me banim në Sansepolcro, akuzohet për posedim dhe tregti droge. Operacioni për kapjen e 24-vjeçarit nisi pikërisht me zbulimin e tre kilogramëve e katërqind gramëve kokainë.
Droga u gjet e fshehur mirë, nën tokë, në një shkurre jashtë qendrës, në kodrat mes Montesca dhe Uppiano. Kontrolli i mëpasshëm i kryer në shtëpinë ku jeton djali i lejoi ushtarakëve të sekuestronin edhe 50 gramë të tjera të së njëjtës lëndë, të ndara në doza dhe të gatshme për shpërndarje droge, si dhe peshore precize peshimi, lëndë prerëse dhe material paketimi.
Duke pasur parasysh sasinë e madhe të drogës së sekuestruar, hetimet janë ende në vijim, të mbuluara me konfidencialitet maksimal, të koordinuara nga Prokuroria Publike e Perugias.
Qëllimi tani është, në fakt, të arrihet te rrjeti i shpërndarjes së drogës, që kishte për furnizues 24-vjeçarin. Kokaina që ai posedonte sipas karabinierëve përdorej për të furnizuar Tiberin e Sipërm dhe Valtiberinën Toskane.
24-vjeçari u vu në dispozicion të organeve të drejtësisë, duke përfunduar në burgun Capanne në Perugia.
