“Do më bjerë infarkt në burg!”.
Ky është pretendimi me të cilin ish-Drejtoresha e Kabinetit të ministrit Arben Ahmetaj, Alda Klosi ka kërkuar për të dytën herë lirinë në Gjykatën e Apelit.
Klosi i është drejtuar këtë të hënë me një tjetër kërkesë Gjykatës së Tiranës, duke kërkuar zbutjen e masës së sigurisë për shkak të gjendjes së saj shëndetësore.
Dhoma penale pritet të caktojë këtë të hënë një ekspert mjeko-ligjor që të përcaktojë nëse i rrezikohet shëndeti gjatë qëndrimit të saj në paraburgim, pasi Klosi pretendon se ka rrezik për infarkt të miocardit.
Ndërkohë, më 20 shkurt gjykata e Apelit rrëzoi kërkesën e parë të ish-zyrtares për masë më të lehtë sigurie pavarësisht pretendimeve të Alda Klosit se i duhej të kujdesej për dy fëmijët e mitur dhe nënën e sëmurë.
Sakaq, këtë të hënë, gjatë procesit gjyqësor u bë me dije edhe ndryshimi i avokatit mbrojtës të saj. Në vijim të prcesit Klosi do të përfaqësohet nga avokati Arbër Hoxha, ndërsa deri më tani mbrohej nga Ilirjan Muho.
Ish-Këshilltarja e kryeministrit Rama ndodhet e arrestuar që prej 3 shkurtit pas dëshmisë së dytë të dhënë në polici nga pastruesja Rozeta Dobi, e cila pranoi se mbi 400 mijë euro që u gjetën në tubat e aspirimit të banesës së saj janë të Alda Klosit.
Sanitarja tha për hetuesit se kishte bashkëpunuar me Klosin dhe se paratë ia kishte dhënë vetë ajo për t’ia ruajtur pasi kishte konflikte me ish-bashkëshortin, por avokati i Alda Klosit thotë se është deklarim i rremë.
Ndërkohë, Klosi akuzohet për pastrim parash, fshehje dhe mosdeklarim të pasurisë dhe deklarim të rremë përballë OPGJ. Një ditë më parë, policia vuri në sekuestro një garazh dhe një apartament në rrugën “Kongresi i Lushnjës” në Tiranë, në pronësi të ish-zyrtares.
