Ndodh në Krujë/ 17-vjeçari kapet me kallashnikov dhe fishekë luftarakë

Vetëm 17 vjeç, por kjo nuk e ka penguar të miturin me iniciale S.C. nga Borizana e Krujës që të mbajë armë.

I riu është arrestuar nga policia pasi i është gjetur në posedim një kallashnikov dhe 30 fishekë luftarakë.

Arrestimi i një të mituri me armë vjen në një kohë kur krimi në vend po godet duke mos kursyer as jetë të pafajshme dhe numri i viktimave në atentate kriminale është rritur frikshëm.

Njoftimi i policisë:

Operacioni, falë inteligjencës informative, u finalizua me vënien në pranga të një 17-vjeçari, si dhe me sekuestrimin e një arme zjarri kallashnikov dhe një sasie municioni luftarak.

Shërbimet e Komisariatit të Policisë Krujë, me mbështetjen e inteligjencës informative, për një rast të mbajtjes pa leje të armëve të zjarrit, kanë organizuar dhe finalizuar operacionin policor të koduar “Informimi”, si rezultat i të cilit u arrestua në flagrancë shtetasi:

1. C., 17 vjeç, banues në fshatin Borizanë, Krujë.

Shërbimet e Policisë gjetën një armë zjarri kallashnikov, krehër arme dhe 30 fishekë luftarak, të cilat u sekuestruan në cilësinë e provës materiale.

Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme.