Detaje të reja kanë dalë në dritë lidhur me rulotin që u bllokua mbrëmjen e djeshme në pikën e kalimit kufitar të Kapshticës, brenda së cilit janë gjetur rreth 100 kg kanabis.
Ruloti drejtohej nga një shtetas rumun, i cili tentoi të kalonte drejt Greqisë. Mësohet se ai ishte i shoqëruar nga partnerja e tij, por ashtu shtetase rumune.
Fillimisht rumuni ka deklaruar se është biznesmen dhe ndodhej në Shqipëri për pushime.
Sa i përket lëndës narkotike, pasi mjeti kaloi në skaner, ajo u gjet e fshehur në pjesën e bagazhit, poshtë tapicerisë dhe ishte e ndarë në disa pako. Policia ka gjetur 75 pako të mbështjella, të ndara në masa 1 kg, 1.5 kg, dhe një pako me 12 kilogramë kanabis.
Ndryshe nga çfarë u raportua mbrëmjen e djeshme, ku bëhej fjalë për 80 kilogramë, tashmë policia dyshon se sasia shkon në afro 100 kg.
Mbrëmjen e së dielës është marrë në pyetje drejtuesi i mjetit, ndërsa pritet një deklaratë zyrtare nga policia me të dhënat për peshën e saktë të lëndës narkotike.
Njoftimi i policisë:
Si rezultat i një operacioni të mirëkoordinuar nga shërbimet e Stacionit të Policisë Kufitare Kapshticë, në bashkëpunim me specialistët e Seksionit për Hetimin e Narkotikëve dhe Trafiqeve të Paligjshme të DVP Korçë, është goditur 1 tjetër tentativë e trafikimit të lëndëve narkotike në drejtim të shtetit grek.
Në kuadër të këtij operacioni, në dalje të Republikës së Shqipërisë, është ndaluar e shoqëruar një shtetas rumun dhe është sekuestruar një sasi e lëndës narkotike kanabis.
Nga ana e Policisë po vijon puna për dokumentimin e plotë të këtij rasti dhe në përfundim të veprimeve procedurale, peshimit të sasisë të lëndës narkotike, do ju informojmë me një informacion më të detajuar.
