Dy shqiptarë në Latina të Italisë janë arrestuar nga policia me 17 kg kokainë.
Mësohet se operacioni antidrogë ka nisur të enjten pasdite, ku karabinierët u angazhuan për të kryer kontrolle të imtësishme të mjeteve të dyshimta, teksa ishin stacionuar në akset periferike.
Pasi identifikuan dy shqiptarët, policët vendosën të vazhdonin me një kontroll më të thelluar të furgonit të tyre, tip “Fiat Ducato”.
Ajo që nxiti dyshimet e hetuesve dhe motivoi kërkimet ishte nervozizmi që të dy nuk mund ta fshihnin. Dhe në fakt në bordin e mjetit, brenda një kontejneri të ngjashëm me një kovë të madhe, u zbuluan 17 kg kokainë.
Një sasi rekord në kuadër të operacioneve antidrogë të kryera nga forcat e policisë vitet e fundit në territorin e kryeqytetit Pontin.
Të dy shqiptarët përfunduan në burg, ndërkohë që vijojnë hetimet për të përcaktuar rolin e tyre në trafikun lokal dhe ndërkombëtar të drogës.
