Policia e rendit dhe ajo bashkiake e Bashkisë së Matit, kanë dhunuar fizikisht një qytetare, Violeta Rica duke i shkaktuar fraktura dhe plagë në trup.
Ngjarja e rëndë ka ndodur në fshatin Bushkash, ku policia ka shkuar për t`i shembur murin rrethues të banesës kësaj qytetareje.
Janë publikuar edhe pamje të momentit të dhunës ndaj qytetares nga ana e efektivëve të policisë, të filmuar nga vëllai i Violeta Ricës.
Ky i fundit dëgjohet që u kërkon punonjësve të policisë dhe bashkisë që t`i vënë në dispozicion urdhrin për shembjen e murit, por një dokument i tillë duket se nuk ekziston.
E dhunuara ka treguar sesi policia e dhunoi, në kushtet kur ajo nuk ka bërë asnjë reagim apo kundërshtim, vetëm se u ka kërkuar që t`i vënë në dispozicion vendimin për shembjen e murit të banesës.
Në rrëfimin e saj, Vjoleta ka treguar policia e Matit ka ushtruar dhunë makabre ndaj saj brenda furgonit të policisë deri sa ajo ka mbetur pa ndenja.
Zonja Rica tregon gjithashtu se edhe pse ishte pa ndenja në furgonin e policisë, efektivët nuk e kanë dërguar në spital por është dashur ardhja e kunatës së saj e cila ka hapur derën e furgonit dhe e ka parë në gjendje skandaloze dhe pas kësaj e kanë dërguar në spital.
Rica: Isha duke punuar me bel dhe erdhi policia, njëri furgon u ndal te mani dhe tjetri përballë avllisë. Erdhi Gëzim Murrani dhe hipi te muri mbajtës dhe më tha si je duke më zgjat dorën, se meriton dorën time je tuj hi me hile, pse nuk i lajmërove robt i thash, në këtë moment më dolën shumë njerëz pas të policisë dhe më kanë marrë me forcë, unë u ula në mur të avllisë u mbështeta dhe më kanë ushtruar forcë dhe dhunë. Më kanë kapur në krah dhe më është kalb dhe gjithë trupi krejt kalb. Nuk mundem me lujt dhe më fal për shprehjen por edhe me dal jashtë nuk mundem.
Pyetje: Cila ishte arsyeja që erdhi policia?
Rica: Me prish murin e avllisë të pronës.
Pyetje: Çfarë ju komunikuan?
Rica: Asnjë fjaë dhe direkt me forcë kanë prish murin. Kam marrë telefonin me komuniku me vëllezërit duke më bllokuar duart bashkë me telefonin. Më kanë marrë me forcë nga muri i avllisë dhe më kanë qit jashtë territorit dhe më kanë futur me forcë në furgon dhe aty më kanë ushtruar forcë. Ishin shumë policë. Kam qënë pa ndenja dhe nuk e kam kuptuar veten se ku kam përfunduar. Vetëm më kanë ushtruar forcë policët. Katër burra më kanë marrë peshë prej murit të avllisë.
Pyetje: Kush ju solli në spital?
Rica: Ka ardhur kunata dhe ka hapur derën e policisë dhe një polic e ka kërcënuar se përse e hape se s’të lejohet ta prekësh me dorë.
Pyetje: Edhe pse ishe e dhunuar vazhdonin t’ju mbanin në furgonin e policisë?
Rica: Brenda në furgon me forcë, vetëm kur ka ardh kunata më kanë nxjerrë.
/Syri TV/
