Hemoragjia e kandidatëve për bashkitë në zgjedhjet lokale duket se nuk është problem i vetëm për PD e Enkelejd Alibeajt, kur na ndajnë më pak se 45 ditë nga 14 Maji.
Një tjetër zyrtar i lartë i grupimit “Alibeaj” ka vendosur të largohet së fundmi nga detyra që i ishte caktuar. Ai është këshilltari ligjor i grupit parlamentar të Alibeajt që në ditën e sotme u katandis në vetëm 9 deputetë.
Marash Logu, të cilin e kemi parë duke mbrojtur palën e Alibeajt në KQZ dhe KAS, përmes një postimi në rrjetet sociale ka bërë me dije se ka dorëzuar dorëheqjen.
Ai falënderon drejtuesit për besimin dhe shprehet se do të mbetet anëtar i PD, por pa dhënë arsyet e kësaj dorëheqje.
“Kam paraqitur sot dorëheqjen nga funksioni i këshilltarit ligjor të Grupit Parlamentar të PD-së. Faleminderit lidershipit për besimin dhe secilit prej deputetëve demokratë për bashkëpunimin. Mirënjohës çdo demokrati për mbështetjen dhe dashamirësinë gjatë këtij rrugëtimi. Do të vazhdoj të mbetem anëtar i PD-së dhe të kontribuoj si profesionist i ligjit në familjen tonë politike”, shkruan Logu.
