Të shtëna me armë zjarri janë regjistruar pasditen e sotme në qytetin e Lushnjës dhe për pasojë një grua ka mbetur e plagosur.
Mësohet se në fshatin Ballagat është plagosur 60-vjeçarja Bajame Seneja, pasi është qëlluar nga një automjet në lëizje.
“Rreth orës 17:20, në fshatin Ballagat, Lushnjë, në rrethana ende të paqarta është plagosur me armë zjarri shtetasja B. S., 60 vjeçe, banuese në Ballagat, Lushnjë, e cila ndodhet në spital, në kujdesin e mjekëve. Shërbimet e Policisë kanë shkuar menjëherë në vendngjarje , janë ngritur pika kontrolli në të gjitha hyrje-daljet e qytetit të Lushnjës dhe vijon krehja e zonës me qëllim kapjen e autorëve”, njofton policia.
Ngjarja ka ndodhur pranë fshatit Ballagat dhe ka për motiv vrasjen e ndodhur dy vite më parë, pas një konflikti për pronën mes disa pjesëtarëve të fisit Hasalla.
E plagosur ka mbetur motra e shtetasit Kastriot Hasalla. Ajo ka marrë një plumb në këmbë dhe si pasojë është dërguar në spital dhe ndodhet jashtë rrezikut për jetën.
Sakaq, grupi hetimor ndodhet në vendngjarje dhe vijon punën intensive për zbardhjen e plotë të ngjarjes.
Ngjarja e 2021
Sa i përket ngjarjes së të enjtes së 29 korrikut 2021, Kastriot Hasalla i mori jetën kushëririt të tij Romeo Hasalla dhe plagosi 3 të tjerë pas sherrit për pronat në fshatin Garunjas.
Kastriot Hasalla ndodhet në burg për vrasje, pas konflikti për një sipërfaqe toke ku të dyja palët pretendonin se kishin pronësinë.
Gjatë seancave gjyqësore për Kastriotin, vëllai i tij Jonus Hasalla u shpreh se ngjarja është e rëndë dhe kishte pohuar se i trembej një hakmarrje nga pala tjetër.
Në sallën e gjyqit përpara trupit gjykues, Kastriot Hasalla pranoi autorësinë e ngjarjes të kryer në gjendje të rëndë psikologjike dhe kërkoi që djali, Mario Hasalla dhe vëllai i tij Afrim Hasalla të lirohen pasi nuk kishin marrë pjesë në vrasje.
Në momentin e ngjarjes ishin prezentë Shuaip Hasalla së bashku me tre djemtë e tij Emiljanin, Laertin dhe Romeon, ndërsa Kastrioti ishte bashkë me të vëllain dhe djalin. Vajtja e tyre te toka ishte shkulja e ullinjve që familja e Shaipit kishte mbjellë në tokat që Kastrioti pretendonte se e kishte të vetën.
Sapo ka filluar t’i shkulë me zetor kanë qenë Romeo me vëllezërit e tij që janë përleshur me djalin e Kastriotit dhe vëllain. Të gjendur në këto kushte Kastrioti ka nxjerrë armën e gjahut të cilën e kishte në zetor dhe ka qëlluar në drejtim të Romeos, i cili humbi jetën, ndërsa babai dhe vëllezërit u plagosën lehtë.
Pas ngjarjes policia arrestoi vëllanë e Kastriotit dhe djalin, ndërsa vet Kastrioti u vetëdorëzua tre ditë më pas.
